Առաքելությունն ավարտված է․ «Վագներ»-ը հայտարարել է Մալիից հեռանալու մասին

«Վագներ» ռուսական ոչ պետական զինված կազմավորումը հայտարարել է, որ ավարտել է իր «հիմնական առաքելությունը» Մալիում և լքում է երկիրը։ Հաղորդագրությունը հրապարակվել է վարձկաններին մոտ կանգնած «Разгрузка Вагнера»ալիքը, գրում է Meduza-ն։

Հրապարակման մեջ ասվում է, որ վարձկանները «Մալիի ժողովրդի հետ ուս ուսի պայքարել են ահաբեկչության դեմ» երեքուկես տարի։

«Մենք ոչնչացրել ենք հազարավոր զինյալների և նրանց հրամանատարների, որոնք տարիներ շարունակ ահաբեկել են քաղաքացիական բնակչությանը։ Մենք կատարել ենք գլխավոր խնդիրը՝ բոլոր տարածաշրջանային մայրաքաղաքները վերադարձել են օրինական իշխանությունների վերահսկողության տակ։ Առաքելությունն ավարտված է։ «Վագները» վերադառնում է տուն»,- ասվում է հայտարարությունում։

Առաջին հաղորդագրությունները, որ «Վագներ»-ը վարձկանների է հավաքագրում Մալիում աշխատելու համար, լրատվամիջոցներում հայտնվել էին 2021 թվականի սեպտեմբերին։ Այնուհետև, պետական ​​հեղաշրջման արդյունքում, Մալիում իշխանության եկավ գնդապետ Ասիմի Գոյտան, որից հետո այնտեղ տեղակայված ավելի քան հինգ հազարանոց ֆրանսիական զորքերը դուրս բերվեցին երկրից։ Արևմտյան լրատվամիջոցների տվյալներով՝ վարձկանները պետք է մարզեին մալիացի զինվորականներին և ապահովեին բարձրաստիճան պաշտոնյաների պաշտպանությունը։ Ռուսաստանի արտաքին գործերի նախարարությունը, ըստ էության, հաստատել էր գործարքը՝ միաժամանակ ընդգծելով, որ ռուսական իշխանությունները դրա հետ որևէ կապ չունեն։

«All Eyes On Wagner» նախագիծը հրապարակել էր Մալիում «Վագներ»-ի ներկայության առաջին տարվա մասին զեկույց: Այնտեղ, ի թիվս այլ բաների, խոսվել էր զանգվածային սպանությունների, բռնաբարությունների, կողոպուտների և խաղաղ բնակիչների վրա հարձակումների մասին։

2024 թվականի ամռանը մարտեր էին տեղի ունեցել մի կողմից՝ տուարեգ ապստամբների, մյուս կողմից՝ մալիական կառավարական զորքերի և վագներականների միջև։ Մարտի ընթացքում կառավարական զորքերը և վագներականները դարանակալվել էին։ Տարբեր աղբյուրների համաձայն՝ սպանվել էր 20-ից 80 վարձկան։

Թարգմանությունը՝ Էմմա Չոբանյանի