21.01.2026 | 21:44
Հոգևորականը երեկ միացել էր Փաշինյանին, այսօր՝ Գարեգին Բ-ին․ ճնշումների մասին ահազանգեր. ՏԵՍԱՆՅՈՒԹ
Արմեն Սարգսյանի ստորագրած մի շարք օրենքներում չկա աղմկահարույց օրենքը. նախագահը կդիմի՞ ՍԴ
Քաղաքականություն
11.10.2018 | 14:29
ՀՀ նախագահ Արմեն Սարգսյանը դեռ չի ստորագրել շուրջ տասը օր առաջ խորհրդարանի կողմից ընդունված և մեծ աղմուկ բարձրացրած ՀՀ «Ազգային ժողովի կանոնակարգ» սահմանադրական օրենքը:
Նախագահի օգնական Հասմիկ Պետրոսյանը Factor.am-ին ասաց՝ Արմեն Սարգսյանն օրենքը ստորագրելու համար ունի 21 օր ժամանակ:
«Այդ ընթացքում անպայման իր դիրքորոշումը կարտահայտի»,- նշեց տիկին Պետրոսյանը:
Մեր հստակեցնող հարցին՝ հնարավո՞ր է Արմեն Սարգսյանը դիմի Սահմանադրական դատարան, Հասմիկ Պետրոսյանը կրկին նշեց, որ 21 օր ժամանակ կա, և այդ ընթացքում նախագահը որոշում կկայացնի:
Նշենք, որ երեկ նախագահ Արմեն Սարգսյանն արդեն իսկ ստորագրել է անցած նստաշրջանին ԱԺ ընդունած «Ազատ տնտեսական գոտիների մասին» ՀՀ օրենքում փոփոխություն կատարելու մասին, «Հաշվեքննիչ պալատի մասին» ՀՀ օրենքում փոփոխություններ և լրացում կատարելու մասին, «Էլեկտրոնային հաղորդակցության մասին» ՀՀ օրենքում փոփոխություններ և լրացում կատարելու մասին Հայաստանի Հանրապետության օրենքները:
Հիշեցնենք, որ աղմկահարույց այդ նախագիծն ընդունվեց հոկտեմբերի 2-ին ԱԺ արտահերթ նիստում, ինչին հաջորդեց վարչապետ Նիկոլ Փաշինյանի գլխավորությամբ ժողովրդի կողմից Ազգային ժողովի շրջափակումը: Հենց այդ օրն էլ Փաշինյանը հարթակից դիմեց Միացյալ Նահանգներում գտնվող նախագահ Արմեն Սարգսյանին՝ նրան հորդորելով չստորագրել վիճահարույց այդ օրենքը և դիմել ՍԴ:
