Քաղաքականություն
05.06.2025 | 22:58
ՌԴ ԱԴԾ-ն պնդում է, որ «անցանկալի կազմակերպություն» հայտարարված Բրիտանական խորհուրդը (British Council) զբաղվել է տեղեկությունների հավաքագրմամբ Ուկրաինայի օկուպացված շրջաններում տիրող իրավիճակի, այդ թվում՝ այնտեղ տեղակայված ռուսական զորքերի մասին, գրում է Մեդուզան։
«Ռուսաստանի զինված ուժերի Ուկրաինայում հատուկ գործողությունների մեկնարկից հետո Բրիտանական խորհրդի գործունեությունը ձեռք է բերել բացահայտ դիվերսիոն բնույթ։ Այսպիսով, ուկրաինացի փախստականների հնարավորությունների միջոցով, օգտագործելով նրանց ընտանիքները և Ուկրաինայի տարածքում սերտ կապերը, Բրիտանական խորհուրդը կազմակերպել է նոր շրջաններում իրավիճակի զարգացման, ռուսական զորքերի տեղակայման մասին տեղեկատվության և այլնի վերաբերյալ հետախուզական տեղեկատվություն ստանալու աշխատանքներ»,- ասվում է հայտարարության մեջ։
Որպես դրա «ապացույց»՝ ԱԴԾ-ն պատմել է Ուկրաինայի և Ռուսաստանի քաղաքացի, Խերսոնի մարզից Սերգեյ Չեբուկինի քրեական գործի մասին, որը մեղադրվում է պետական դավաճանության մեջ։ Ձերբակալությունից հետո նա, իբր, խոստովանել է ուկրաինացի փախստական Սվետլանա Վոլոշինայի հետ կապերի մասին, որը Մեծ Բրիտանիա է մեկնել 2022 թվականի փետրվարին: ԱԴԾ-ի տվյալներով՝ նա «համագործակցություն է հաստատել Բրիտանական խորհրդի հետ և Չեբուկինին է փոխանցել անհրաժեշտ տեղեկատվությունը փոխանցելու խնդրանքները»: Չեբուկինը, ի վերջո, դատապարտվել է 12 տարի 6 ամիս ժամկետով ազատազրկման։
Բրիտանական խորհուրդը հասարակական կազմակերպություն է, որը հիմնադրվել է 1934 թվականին և հաշվետու է Բրիտանիայի ԱԳՆ-ին։ Այն զբաղվում է IELTS թեստերի կազմակերպմամբ, միջազգային կրթական ծրագրերի ֆինանսավորմամբ, Մեծ Բրիտանիայի և այլ երկրների միջև մշակութային կապերի զարգացմամբ:
Խորհուրդը չի աշխատում Ռուսաստանում 2018 թվականից ի վեր: IELTS-ի կազմակերպիչները հրաժարվել են անգլերեն լեզվի քննություններ անցկացնել ՌԴ-ում 2022 թվականի մարտին՝ ռուսական զորքերի Ուկրաինա լայնածավալ ներխուժումից կարճ ժամանակ անց:
Ռուսաստանի Գլխավոր դատախազությունը հունիսի 5-ին Բրիտանական խորհուրդը հայտարարել է «անցանկալի կազմակերպություն»։
Թարգմանությունը՝ Էմմա Չոբանյանի
