Մոսկվայում չեչենների կողմից առևանգված հայ գործարարի նկատմամբ քրեական գործ է հարուցվել ատելության հրահրման և ծայրահեղականության կոչերի համար

Մոսկվայում Չեչնիայի անվտանգության ուժերի կողմից առևանգված հայազգի գործարար, բլոգեր Արեգ Շչեպիխինի դեմ քրեական գործ է հարուցվել ատելություն կամ թշնամանք հրահրելու (Քրեական օրենսգրքի 282-րդ հոդվածի 2-րդ մասի «ա» կետ) և ծայրահեղականության հրապարակային կոչերի (280-րդ հոդվածի 2-րդ մաս) համար։ Այս մասին հայտնել է Ռուսաստանի քննչական կոմիտեն, փոխանցում է Current time-ը։

Մոսկվայի Յարոսլավսկի երկաթուղային կայարանում առևանգման դեպքից հետո Չեչնիայի ազգային քաղաքականության, արտաքին հարաբերությունների, մամուլի և տեղեկատվության նախարար Ահմեդ Դուդաևը հայտարարել էր, որ տղամարդը «չի առևանգվել, այլ ձերբակալվել» է հանրապետության անվտանգության ուժերի կողմից, և նրա դեմ հետաքննություն է անցկացվում կրոնական զգացմունքները վիրավորելու և ատելություն կամ թշնամանք հրահրելու հոդվածներով։

Շչեպիխինը դեռևս ՌԴ Քննչական կոմիտեում է: «Осторожно, новости» տելեգրամ ալիքը հայտնում է, որ  նրան երեկվանից հարցաքննում են, թույլ չեն տվել քնել և խոսել փաստաբանի հետ:

Քննչական կոմիտեն պնդում է, որ Արեգ Շչեպիխինի դեմ քրեական գործ հարուցելու որոշում է կայացվել նրա տեսագրություններն ուսումնասիրելուց հետո:

«Հոգեբանական և լեզվաբանական ուսումնասիրությունը բացահայտել է ազգային/էթնիկական հատկանիշներով նույնականացված անձանց խմբի նկատմամբ բռնի գործողություններ կատարելու հրահրման նշաններ, ինչպես նաև նրանց նվաստացումը նրա հայտարարություններում»,- ասվում է  հայտարարության մեջ:

Հավելենք, որ Քննչական կոմիտեն նախօրեին  քրեական գործ էր հարուցել տղամարդու առևանգման (Քրեական օրենսգրքի 126-րդ հոդված) և պաշտոնեական լիազորությունների չարաշահման (Քրեական օրենսգրքի 286-րդ հոդված) դեպքերի առթիվ։ Մեղադրանքներ են առաջադրվել վեց անձի։ Նրանց նկատմամբ պետք է ընտրվի խափանման միջոց։

Թարգմանությունը՝ Էմմա Չոբանյանի