«Ինչի՞ մասին խոսել». Պուտինը Կիևին մեղադրել է «ահաբեկչությունների» մեջ ու մերժել Զելենսկիի հետ հանդիպման հնարավորությունը

Կիևի կողմից մարդասիրական նկատառումներից ելնելով կարճաժամկետ հրադադարից հրաժարվելը ցույց է տալիս, որ Ուկրաինային խաղաղություն պետք չէ։ Այս մասին հայտարարել է Ռուսաստանի նախագահ Վլադիմիր Պուտինը, գրում է Ինտերֆաքսը։

«Ինչ վերաբերում է մարդասիրական նկատառումներով 2-3 օրով հրադադարի վերջին մերժմանը, սա առաջին դեպքը չէ։ Դա մեզ չի զարմացնում, այլ միայն համոզում է, որ Կիևի ռեժիմին ընդհանրապես խաղաղություն պետք չէ։ Նրա համար խաղաղությունը, ամենայն հավանականությամբ, նշանակում է իշխանության կորուստ։ Եվ այս ռեժիմի համար իշխանությունը, ակնհայտորեն, ավելի կարևոր է, քան խաղաղությունը և այն մարդկանց կյանքը, որոնց նրանք, ակնհայտորեն, իրենցը չեն համարում»,- ասել է Պուտինը Ռուսաստանի կառավարության անդամների հետ հանդիպման ժամանակ։

Բացի այդ, Պուտինը հայտարարել է, որ «Կիևի ղեկավարությունն անցել է ահաբեկչություններ կազմակերպելուն՝ փորձելով վախեցնել Ռուսաստանին»։ ՌԴ նախագահը, միաժամանակ, կասկածի տակ է դրել երկրների ղեկավարների մակարդակով հանդիպման հնարավորությունը։

«Նրանք խնդրում են դադարեցնել ռազմական գործողությունները 30 կամ նույնիսկ 60 օրով։ Նրանք խնդրում են բարձր մակարդակի հանդիպում անցկացնել։ Բայց ինչպե՞ս կարող են նման հանդիպումներ անցկացվել այս պայմաններում։ Ինչի՞ մասին խոսել։ Ո՞վ է բանակցում նրանց հետ, ովքեր հույսը դնում են ահաբեկչության վրա, ահաբեկիչների հետ։ Եվ ինչո՞ւ պետք է խրախուսել՝ նրանց ռազմական գործողություններում դադար տրամադրելով»,- ասել է ՌԴ նախագահը։

Պուտինը նաև առաջին անգամ խոսել է Կուրսկի և Բրյանսկի մարզերում կամուրջների պայթեցման մասին՝ ասելով, որ այդ որոշումներն Ուկրաինայում կայացվել են քաղաքական մակարդակով, և որ «Կիևի գործողությունները նպատակ ունեին խափանել Ստամբուլում Ռուսաստանի և Ուկրաինայի միջև բանակցությունների երկրորդ փուլը»։

«Սա նպատակային հարձակում է խաղաղ բնակչության դեմ։ Բոլոր միջազգային նորմերի համաձայն՝ նման գործողությունները կոչվում են «ահաբեկչություն»։ Ստամբուլում մեր առաջարկած բանակցությունների հաջորդ փուլի նախօրեին խաղաղ բնակչության, այդ թվում՝ կանանց և երեխաների դեմ կատարված բոլոր հանցագործությունները, անկասկած, ուղղված էին բանակցային գործընթացը խաթարելուն»,- ասել է Ռուսաստանի նախագահը։

Մինչ այդ, այսօր ճեպազրույցի ժամանակ Ուկրաինայի նախագահ Վլադիմիր Զելենսկին կրկնել է Ռուսաստանի և Ուկրաինայի առաջնորդների հանդիպման կոչը։

«Ռուսների ընտրությամբ հանդիպում. Ստամբուլ, Վատիկան, Շվեյցարիա։ Մենք առաջարկում ենք հանդիպում երկուշաբթի օրվանից՝ ցանկացած օր»,- ասել է նա`նշելով, որ նման հանդիպումից առաջ անհրաժեշտ է համաձայնության գալ հրադադարի շուրջ։

Զելենսկին նաև ասել է, որ Թուրքիայի նախագահ Ռեջեփ Թայիփ Էրդողանը առաջարկել է քառակողմ հանդիպում՝ Էրդողան, ԱՄՆ նախագահ Դոնալդ Թրամփ, Զելենսկի և Պուտին։ Ուկրաինայի նախագահը հայտարարել է, որ պատրաստ է նման հանդիպման։ Բացի այդ, նա նշել է, որ Ստամբուլում բանակցությունները ներկայիս մակարդակով չեն լուծում որևէ այլ հարց՝ բացի գերիների փոխանակումից։

Հիշեցնենք, որ հունիսի 2-ին Ստամբուլում տեղի էին ունեցել ՌԴ-ի և Ուկրաինայի պատվիրակությունների բանակցությունները։

Թարգմանությունը՝ Էմմա Չոբանյանի