ՌԴ-ում ազգությամբ ադրբեջանցի պատգամավորը, որը Խանտի-Մանսիյսկի ինքնավար մարզն ուզբեկների պատմական հայրենիքն է անվանել, զրկվել է պաշտոնից

ՌԴ Խանտի-Մանսիյսկի ինքնավար օկրուգի Դումայի պատգամավորներն իրենց գործընկեր Խալիդ Թագիզադեին զրկել են Սոցիալական զարգացման հարցերի հանձնաժողովի փոխնախագահի պաշտոնից՝ հայտարարության պատճառով, որ Ուզբեկստանից միգրանտները, հնարավոր է, գնում են Յուգրա՝ իրենց պատմական հայրենիք, գրում է Current time-ը:

Թագիզադեն ազգությամբ ադրբեջանցի է։ Հաղորդվում է, որ նա հունիսի 3-ին մեկնել է Ադրբեջան:

Սոցիալական ցանցերում հայտնված տեսանյութում պատգամավորը նշում է, որ միգրանտները  տարբեր են լինում։ Նա կենտրոնացել է Ուզբեկստանի քաղաքացիների վրա և նշել, որ Յուգրան և Տյումենի շրջանի մի մասը «պատմականորեն գտնվել են Սիբիրյան խանության մեջ», որը կառավարվում էր Շեյբանիների դինաստիայի խաների կողմից։

«Շեյբանիների դինաստիան իշխող ուզբեկական դինաստիան է, Բուխարայի խանության բնիկները։ Հնարավոր է՝ միգրանտները գալիս են այստեղ՝ իրենց պատմական հայրենիք»,- նշել է նա։

Այդ պահին նրան ընդհատել է Դումայի խոսնակ Բորիս Խոխրյակովը: Ավելի ուշ Պետդումայի պատգամավորներ Վլադիմիր Սիսոևը և Մաքսիմ Իվանովը դիմել են ՌԴ Գլխավոր դատախազություն՝ խնդրելով ստուգել  Թագիզադեի հայտարարությունները՝ «ծայրահեղականության և ազգային պատկանելության հիման վրա ատելության կամ թշնամանքի հրահրման» վերաբերյալ:

Թագիզադեն արձագանքից հետո ներողություն է խնդրել իր խոսքերի համար։ Նա նշել է, որ փորձել է մեղմել պատգամավոր Միխայիլ Սելյուկովի և փոխնահանգապետ Վսևոլոդ Կոլցովի միջև կոնֆլիկտային իրավիճակը, և իր հայտարարությունը «ենթադրություն էր, այլ ոչ թե կատեգորիկ հայտարարություն»։

Խանտի-Մանսիյսկի ինքնավար օկրուգի Դումայի պատգամավորները, նրան պաշտոնից զրկելուց բացի, պարտավորեցրել են  հրապարակային ներողություն խնդրել, հայտարարել են նրա նկատմամբ «հրապարակային դատապարտման» մասին և հանձնարարել են ընտրողներին տեղեկացնել «խորհրդարանական էթիկայի կանոնների խախտման» փաստերի մասին։

Թարգմանությունը՝ Էմմա Չոբանյանի