Ես նմա՞ն եմ մարդու, որը կարող է ճնշումներ գործադրել. Արարատ Միրզոյանը՝ ՀՀԿ-ական պատգամավորների նկատմամբ ճնշումներ գործադրելու մեղադրանքների մասին. ՏԵՍԱՆՅՈՒԹ

Խորհրդարանական ուժերի հետ, կարծես թե, ամեն ինչ համաձայնեցված է և ընդհանուր ծրագրից շեղվող զարգացումներ չեն սպասվում: Այս մասին Factor.am-ի հետ զրույցում ասաց ՀՀ առաջին փոխվարչապետ Արարատ Միրզոյանը՝ անդրադառնալով դեկտեմբերին արտահերթ խորհրդարանական ընտրությունների անցկացմանը և այդ օրակարգի շուրջ քաղաքական ուժերի հետ քննարկումներին:

Հիշեցնենք, որ խորհրդարանական ուժերից ԲՀԿ-ի հետ ստորագրվել է հուշագիր, որով խորհրդարանում մեծությամբ երկրորդ քաղաքական ուժը կողմ է արտահայտվել դեկտեմբերին անցկացվելիք խորհրդարանական ընտրություններին և վստահեցրել, որ վարչապետ Փաշինյանի հրաժարականի դեպքում այլ թեկնածու չի առաջադրի, ՀՀԿ-ն հանդես է եկել հայտարարությամբ՝  նշելով, որ իրենք ևս վարչապետի թեկնածու առաջադրելու մտադրություն չունեն, ինչ վերաբերում է  ՀՅԴ-ին, ապա նրանց հետ ևս քննարկումներ տեղի են ունեցել, թեև հուշագրի ստորագրում կամ որևէ պաշտոնական հաղորդագրություն դեռ չկա:

«Իրականում մենք պատրաստվում էինք ավելի բանակցային տարբերակի, պատրաստել էինք սահմանադրական փոփոխությունների նախագիծ, որով հնարավորություն էր ստեղծվելու կամ հանրաքվեով կամ ԱԺ պատգամավորների 2/3-ի քվեարկությամբ կրճատել Ազգային ժողովի լիազորությունների ժամկետը»,- մանրամասնեց փոխվարչապետը՝ նկատելով, որ խորհրդարանական ուժերի կողմից հայտնի նախագծի ընդունումը փոխեց դեպքերի ընթացքը:

Արարատ Միրզոյանն ընդգծեց, որ երկրի համար շատ կարևոր է, որ այս իրավիճակը հանգուցալուծվի՝ որքան հնարավոր է շուտ:

«Առկա ինստիտուցիոնալ ճգնաժամը, խորհրդարանական ճգնաժամը, որոշ դեպքերում նաև՝ սահմանադրական ճգնաժամը խոչընդոտում են երկրի զարգացմանն ու խոցելի դարձնում երկրի անվտանգությունը»,- շեշտեց մեր զրուցակիցը՝ հավելելով, որ այդ ամենին հասնելու համար ընտրվել է Ազգային ժողովը լուծարելու ամենակարճ ճանապարհը՝ վարչապետի հրաժարականը:

Հարցազրույցն ամբողջությամբ՝ տեսանյութում:

Շողիկ Գալստյան