Մշակույթ
03.06.2025 | 14:42
Ե. Չարենցի անվան գրականության և արվեստի թանգարանում հետաքրքիր ցուցադրություն է կազմակերպվել․ մեկ տեղ են հավաքել հայ մեծերի՝ գրականության, երաժշտության, թատրոնի և կինոյի երևելիների անձնական ժամացույցները և «Հիշողության սլաքներ» խորագրով ժամանակավոր ցուցադրություն կազմակերպել․ հայտնում են ԿԳՄՍՆ-ից։
«Ներկայացված շուրջ 60 ժամացույցները պատկանել են Միքայել Նալբանդյանին, Հովհաննես Թումանյանին, Ակսել Բակունցին, Վահրամ Փափազյանին, Բարսեղ Կանաչյանին, Մարտիրոս Սարյանին և այլոց:
ԿԳՄՍ նախարար Ժաննա Անդրեասյանը և նախարարի տեղակալ Ալֆրեդ Քոչարյանը ևս այցելել են թանգարան։
Նախարարը շրջել է ցուցասրահում, հետաքրքրվել ժամացույցների պատմությամբ, որը ներկայացրել է թանգարանի տնօրեն Սյուզաննա Խոջամիրյանը:
Նախարար Ժաննա Անդրեասյանը բարձր է գնահատել ցուցադրության կազմակերպումը և կարևորել հանրության ավելի լայն շերտերի այցելությունների ապահովումը՝ շեշտելով ցուցադրության տեսանելիության և իրազեկվածության բարձրացման հարցը:
Ցուցադրությունը կգործի մինչև հուլիսի 30-ը»,- ասված է հաղորդագրությունում։
