Քաղաքականություն
03.06.2025 | 13:15
Ռուսական զորքերը հարվածել են ուկրաինական Սումիի կենտրոնին, որի հետևանքով զոհվել է 3 մարդ, 16-ը՝ վիրավորվել։ Այս մասին հաղորդում է Ուկրաինայի Արտակարգ իրավիճակների պետական ծառայությունը։ Ավելի վաղ իշխանությունները հայտնել էին երկու մահվան դեպքի մասին, փոխանցում է BBC-ի ռուսական ծառայությունը։
«Քաղաքի թաղամասերից մեկում արկ է ընկել ճանապարհին։ Պայթյունի հետևանքով մեքենա է բռնկվել, հրդեհն արագ մարվել է»,- ասվում է հաղորդագրության մեջ։
Փրկարարների տվյալներով՝ մեկ այլ միկրոշրջանում վնասվել է բնակելի շենք՝ «առանց մեծածավալ ավերածությունների կամ հրդեհի», ինչպես նաև երեք մասնավոր տուն, պահեստային շենք և հիվանդանոցի շենքերից մեկը։
Սումիի մարզի ռազմական վարչակազմն ավելի վաղ հայտնել էր, որ առավոտյան ժամը 9:00-ի սահմաններում համազարկային կրակի ռեակտիվ համակարգերից կրակոցների ժամանակ մարզկենտրոնում հինգ հարված է եղել։ Նրանց տվյալներով՝ վիրավորների թվում կա 17-ամյա դեռահաս, կան նաև ծանր վիճակում գտնվող վիրավորներ։
«Ռուսական զորքերը վայրագ հարված են հասցրել Սումիին»,- այսպես է մեկնաբանել Ուկրաինայի նախագահ Վլադիմիր Զելենսկին քաղաքի հրետակոծության մասին լուրերը։
«Ուղիղ քաղաքին, սովորական փողոցներին՝ ռեակտիվ հրետանուց։ Բացարձակապես միտումնավոր հարված քաղաքացիական բնակչության դեմ։ Այս պահին փրկարարական գործողություն է ընթանում։ Շատ վիրավորներ կան»,- նշել է նա տելեգրամի իր ալիքում։
Զելենսկին կրկին կոչ է արել միջազգային հանրությանը՝ մեծացնել քաղաքական ճնշումը Ռուսաստանի վրա։
Ռուսական կողմը հարվածները դեռևս չի մեկնաբանել։
Թարգմանությունը՝ Էմմա Չոբանյանի
