ՌԴ-ն անօդաչուներով գրոհել է Ուկրաինայի շրջանները․ զոհեր ու վիրավորներ կան

Ռուսական զորքերը հունիսի լույս 3-ի գիշերն անօդաչու թռչող սարքերով հարվածել են Ուկրաինայի տարբեր շրջաններին։ Չեռնիգովում և Օդեսայում հարձակման հետևանքով վնասվել են բնակելի շենքեր, կան վիրավորներ։ Այս մասին հայտնում են տեղական իշխանությունները, գրում է Current time-ը։

«Նախնական տվյալներով՝ վիրավորվել են երեքը՝ մեկ կին ու երկու տղամարդ։ Նրանք ծանր վնասվածքներով հոսպիտալացվել են քաղաքային բժշկական հաստատություններ»,- ասել է Չեռնիգովի ռազմական վարչակազմի ղեկավար Վյաչեսլավ Չաուսը։

Նա նշել է, որ վնասվել են բազմահարկ շենքեր, դպրոցներ, մի քանի խանութներ, ավտոբուսի կանգառներ և մասնավոր հատվածի տներ։ Բացի այդ, հարված է հասցվել արդյունաբերական ձեռնարկության։

Չեռնիգովի քաղաքային ռազմական վարչակազմի ղեկավար Դմիտրի Բրիժինսկու խոսքով՝ վիրավորվել է չորս մարդ՝ երկու կին ու երկու տղամարդ։ Տղամարդիկ ծանր վնասվածքներ են ստացել։ Բոլոր տուժածները ներկայում բժշկական հաստատություններում են։

Ուկրաինական լրատվամիջոցները նաև հայտնում  են Օդեսային անօդաչու թռչող սարքի հարվածի մասին: Օդեսայի մարզի արտակարգ իրավիճակների ծառայության տվյալներով՝ չորս մարդ վիրավորվել է: Հրդեհներ են բռնկվել տարբեր հասցեներում, փրկարարները մարել են դրանք։ Ամենամեծ հրդեհը տեղի է ունեցել սննդամթերքի պահեստներում: Մասնավոր հատվածում այրվել է երկու մեքենա, վնասվել են ավտոտնակներ և բնակելի շենքեր։

«Բնակելի շենքեր և քաղաքացիական ենթակառուցվածքներ են վնասվել, մեքենաներ են այրվել։ Այս պահին զոհերի մասին տեղեկություններ չկան»,- ասել է Օդեսայի քաղաքապետ Գենադի Տրուխանովը։

Խարկովի մարզի Բալակլեյա քաղաքում ռուսական անօդաչու թռչող սարքերի հարվածի հետևանքով մեկ տղամարդ զոհվել է, ևս մեկը՝ վիրավորվել։ Վարչակազմի ղեկավար Վիտալի Կարաբանովի խոսքով՝ անօդաչու թռչող սարքերը հարվածել են քաղաքացիական ձեռնարկության և բաց տարածքի ուղղությամբ։ Նրա խոսքով՝ զոհն ու վիրավորները ձեռնարկության աշխատակիցներ են եղել։

Շրջանային ռազմական վարչակազմի ղեկավար Օլեգ Սինեգուբովն էլ հայտնել է, որ Խարկովի մարզում մեկ օրում հարվածների հետևանքով զոհվել է երեք, վիրավորվել՝ վեց մարդ․ Կովշարովկա գյուղում զոհվել է երկու կին, Բալակլեա քաղաքում՝ մեկ տղամարդ։

Թարգմանությունը՝ էմմա Չոբանյանի