13.01.2026 | 10:16
Պետդեպարտամենտում այսօր Մարկո Ռուբիոն կընդունի Արարատ Միրզոյանին
Շինարարը մահացել է՝ ընկնելով 5-րդ հարկից․ ով է պատասխանատու. ՏԵՍԱՆՅՈՒԹ
Հասարակություն
02.06.2025 | 20:20
Զովունիում կառուցվող բարձրահարկ շենքերից մեկի հինգերորդ հարկից շինարար է ընկել և մահացել։ Դժբախտ պատահարից երեք օր անց աշխատանքները տարածքում շարունակվում են՝ կարծես ոչինչ չի եղել։ Ինչպե՞ս է դեպքը տեղի ունեցել և ո՞վ է եղել պատահարի զոհ դարձած շինարարը․ աշխատակիցներն այսօր նույն էին կրկնում՝ տեղյակ չեն։
Տարածքը հսկող աշխատակիցը սկզբում ասաց, թե տեղյակ չէ պատահարից, ապա հաստատեց, որ մահվան դեպքն իրենց շենքում է եղել։ Shamshyan.com-ը գրել էր, որ շինարարն աշխատել է «Հովսեփյան շին» ընկերությունում, սակայն տարածքում մեզ վստահեցնում էին, թե այդ ընկերությունն աշխատանքներն այստեղ ավարտել է։
Մեզ չհաջողվեց կապ հաստատել «Հովսեփյան շին»-ի հետ․ բաց աղբյուրներում ընկերության մասին տվյալներ չկան։ Այս շենքի բնակարանների վաճառքով զբաղվող ընկերությունն ARGO-ն է։ Մեր զանգին պատասխանած աշխատակիցը տեղյակ էր մահվան դեպքից, սակայն վստահեցրեց, թե դեպքն այլ շենքում է եղել։ Լսելով մեր դիտարկումը, որ շենքի վրա հենց իրենց ընկերության պաստառն է փակցրած, հորդորեց կապվել կառուցապատող ընկերության հետ։ Հարցին՝ ո՞վ է կառուցապատողը, նա հրաժարվեց պատասխանել, իսկ տարածքում հուշող ցուցանակ փակցված չէր։
Նկարահանման ժամանակ անզեն աչքով էլ տեսանելի էր, որ կառուցապատման որոշ նորմեր տարածքում չեն պահպանվում։ Օրինակ՝ չկար փոշեկլանիչ ցանց, իսկ շինարարներին հանձնարարվեց սաղավարտ դնել միայն մեր հարցադրումից հետո։
Քննչական կոմիտեից տեղեկացանք, որ շինարարի մահվան դեպքի առնչությամբ նախաձեռնվել է քրեական վարույթ՝ Քրեական օրենսգրքի 355-րդ հոդվածի 2-րդ մասով՝ շինարարական, լեռնահանքային կամ այլ աշխատանքների կատարման ընթացքում աշխատանքի պաշտպանության կամ անվտանգության ապահովման կանոնները կամ պահանջները խախտելը: Նշանակվել է դիակի դատաբժշկական փորձաքննություն:
Մանրամասները՝ տեսանյութում։
Անի Թամրազյան
