Քաղաքականություն
02.06.2025 | 21:18
Թուրքիա-Ադրբեջան համագործակցությունը, որը պսակվել է այնպիսի խոշոր ենթակառուցվածքային նախագծերով, ինչպիսիք են Բաքու-Թբիլիսի-Ջեյհան նավթատարը, Բաքու-Թբիլիսի-Էրզրում գազատարը և Տրանսանատոլիական բնական գազի խողովակաշարը (TANAP), ոչ միայն օգուտ է բերում հենց երկրներին, այլև շարունակում է կարևոր ներդրում ունենալ տարածաշրջանի և ամբողջ Եվրոպայի էներգետիկ անվտանգության մեջ։ Այս մասին ասվում է Թուրքիայի նախագահ Ռեջեփ Թայիփ Էրդողանի՝ Բաքվի 30-րդ էներգետիկ շաբաթվա մասնակիցներին ուղղված տեսաուղերձում, գրում է Անադոլուն։
Էրդողանը նշել է, որ Ադրբեջանի և Թուրքիայի հարաբերությունները շարունակում են զարգանալ բոլոր ոլորտներում, այդ թվում՝ էներգետիկայի․ վերջին տարիներին համաշխարհային աշխարհաքաղաքական իրադարձությունները կրկին ընդգծել են Թուրքիայի և Ադրբեջանի միջև էներգետիկ անվտանգության ոլորտում համագործակցության կարևորությունը։ Ըստ նրա՝ մարտին բացված Իգդիր-Նախիջևան գազատարը դարձել է երկու երկրների միջև երկարաժամկետ և հաջողակ էներգետիկ գործընկերության վերջին օրինակը։
«Այդ խողովակաշարի գործարկումն ամրապնդել է Նախիջևանի էներգետիկ անվտանգությունը և մեզ միասին ավելի ուժեղ է դարձրել։ Թուրքիայի և Ադրբեջանի միջև էներգետիկ կապի ընդլայնումը մեզ համար ևս մեկ ռազմավարական կարևոր նախագիծ է»,- նշել է նա։
Բացի այդ, Էրդողանը շեշտել է Թուրքիայի և Նախիջևանի, ինչպես նաև Թուրքիայի և Վրաստանի միջև էներգետիկ կապերի հզորությունների մեծացման անհրաժեշտությունը։ Նա նաև հիշեցրել է, որ Թուրքիան, Ադրբեջանը, Բուլղարիան և Վրաստանը «Կանաչ էլեկտրաէներգիայի փոխանցում և առևտուր» նախագծի շրջանակում ստորագրել են փոխըմբռնման հուշագիր և հույս հայտնել, որ այն կավարտվի առաջիկայում։
Նա նաև ընդգծել է Թուրքիայի և Ադրբեջանի միջև բնական գազի նոր նախագծերի մեծ ներուժը։
«Ադրբեջանը, որը տարիներ շարունակ զգալի ծավալի գազ է մատակարարել ինչպես Թուրքիային, այնպես էլ Եվրոպային, ռազմավարական կարևոր դեր է խաղում համաշխարհային էներգետիկ շուկայում, հատկապես՝ ներկայիս իրավիճակում։ Առաջիկա ժամանակահատվածում մենք լավ հնարավորություն ունենք զարգացնելու համագործակցությունը թուրքմենական գազի արտահանման գործում՝ Ադրբեջանի և Թուրքիայի միջոցով՝ ի շահ բոլոր կողմերի»,- ասել է Թուրքիայի նախագահը։
Այսօր Ադրբեջանի նախագահ Իլհամ Ալիևը նաև բանակցություններ է անցկացրել Թուրքիայի էներգետիկայի և բնական պաշարների նախարար Ալփարսլան Բայրաքթարի հետ։
Թարգմանությունը՝ Էմմա Չոբանյանի
