06.10.2026 | 12:37
TRIPP-ի զարգացմանը զուգահեռ սպասվում է Հայաստան–Թուրքիա սահմանի բացում․ Փաշինյան
Գորիսում Ֆրանսիայի պատվավոր հյուպատոսի գրասենյակի բացումը հստակ քաղաքական կամքի մասին է խոսում․ Վահան Կոստանյան․ՏԵՍԱՆՅՈՒԹ
Քաղաքականություն
02.06.2025 | 09:58
«Գորիսում Ֆրանսիայի պատվավոր հյուպատոսի գրասենյակի բացումը հստակ քաղաքական կամքի մասին է խոսում», – Գորիսում ընթացող Հայաստան-Ֆրանսիա ապակենտրոնացված համագործակցության 5-րդ համաժողովի ժամանակ ասաց ՀՀ ԱԳ փոխնախարար Վահան Կոստանյանը։
Փոխնախարարը նշեց, որ բարձր են գնահատում Ֆրանսիայի աջակցությունը ՀՀ ինքնիշխանությանը, տարածքային ամբողջականությանը և ժողովրդավարության հետագա ամրապնդմանը, երկկողմ և եվրոպական ձևաչափով Ֆրանսիայի ցուցաբերած օժանդակությանը ՀՀ պաշտպանական կարողություններին և տնտեսական դիմակայունության ամրապնդմանը, աջակցությունը ՀՀ-ԵՄ գործընկերության ընդլայնմանը, Եվրոպային առավել մոտենալու ցանկություններին։
«Երկու պետությունների հարաբերությունները գտնվում են աննախադեպ բարձր մակարդակի վրա՝ նպատակ ունենալով նաև օժանդակել ՀՀ-ին՝ հաղթահարելու տարածաշրջանային մարտահրավերները։ Հայաստանը, չնայած առկա բոլոր մարտահրավերներին, վճռական ջանքեր է գործադրում տարածաշրջանում տևական խաղաղության հաստատման համար՝ հիմք ընդունելով տարածքային ամբողջականության, ինքնիշխանության և սահմանների անխախտելիության սկզբունքը, որոնք փոխադարձաբար հարգելու հանձնառությունը ՀՀ-ն և Ադրբեջանը ստանձնել են Ալմա-Աթայի հռչակագրով»,- ասաց Կոստանյանը։
Կոստանյանն անդրադարձել է նաև խաղաղության համաձայնագրին, նշելով, որ ՀՀ-ն պատրաստ է անհապաղ ստորագրել և հետագայում վավերացնել այն։ Նրա խոսքով՝ մտահոգությունները հասցեագրելու ամենահստակ, ուղիղ և կարճ ճանապարհը համաձայնագրի ստորագրումն ու վավերացումն է, որով տարածաշրջանում խաղաղ համակեցության դարաշրջան կբացվի։
Մանրամասները՝ տեսանյութում։
Անի Թամրազյան
