Զելենսկին հաստատել է Կիևի մասնակցությունը առաջիկա բանակցություններին

Ուկրաինայի նախագահ Վլադիմիր Զելենսկին հաստատել է Կիևի մասնակցությունը Ռուսաստանի հետ ուղիղ բանակցություններին, որոնք տեղի կունենան հունիսի 2-ին Ստամբուլում։ Ուկրաինական պատվիրակությունը կգլխավորի պաշտպանության նախարար Ռուստեմ Ումերովը։ Համապատասխան հայտարարությունը Զելենսկին տեղադրել է կիրակի՝ հունիսի 1-ին, Telegram-ի իր ալիքում։

«Մեր պատվիրակությունը երկուշաբթի կգլխավորի Ռուստեմ Ումերովը»,-գրել է երկրի ղեկավարը։

Նրա խոսքով՝ նա լսել է Ումերովի, Արտաքին գործերի նախարար Անդրեյ Սիբիգայի, Գլխավոր շտաբի, հետախուզության և Ուկրաինայի անվտանգության ծառայության հաշվետվությունները։ Զելենսկին ընդգծել է, որ Ստամբուլում հանդիպմանն ընդառաջ նա սահմանել է Կիևի դիրքորոշումը։

«Առաջին՝ կրակի ամբողջական և անվերապահ դադարեցում։ Երկրորդ՝ գերիների ազատում։ Երրորդ՝ առևանգված երեխաների վերադարձ։ Եվ՝ ապահով ու կայուն խաղաղություն հաստատելու և անվտանգությունը երաշխավորելու համար, պետք է պատրաստվել ամենաբարձր մակարդակի հանդիպման։ Հիմնական հարցերը կարող են լուծել միայն առաջնորդները»,-հավելել է նա։

Երկուշաբթի՝ հունիսի 2-ին, Մեծ Բրիտանիայի ազգային անվտանգության հարցերով խորհրդականը պետք է ներկա լինի Ռուսաստանի և Ուկրաինայի միջև Ստամբուլում կայանալիք ուղիղ խաղաղ բանակցությունների հերթական փուլին։

ԱՄՆ նախագահի հատուկ ներկայացուցիչ Քիթ Քելլոգը մայիսի 29-ին ABC News հեռուստաընկերությանը տված հարցազրույցում նշել է, որ Եվրոպայի կողմից ակնկալվում է «եռյակի» ձևաչափով մասնակցություն (E3)՝ խոսքը Գերմանիայի, Ֆրանսիայի և Մեծ Բրիտանիայի ազգային անվտանգության հարցերով խորհրդականների մասին է։ E3-ը Լոնդոնի, Բեռլինի և Փարիզի համագործակցության ոչ ֆորմալ մեխանիզմ է՝ արտաքին քաղաքականության և անվտանգության ոլորտում։

Ավելի վաղ այս երեք երկրները օգնություն էին ցուցաբերել Ուկրաինայում հրադադարի պայմանների ձևավորման հարցում։

Ռուսաստանի պատվիրակությունը Ստամբուլի բանակցություններում կրկին կգլխավորի Պուտինի օգնական Վլադիմիր Մեդինսկին։ ՄԱԿ-ում Ռուսաստանի մշտական ներկայացուցիչ Վասիլի Նեբենզյան մայիսի 30-ին ԱԽ նիստում հայտարարել է, որ Ռուսաստանը պատրաստ է դիտարկել Ուկրաինայում կրակի դադարեցման հնարավորությունը՝ այն պայմանով, որ Կիևը հրադադարի ժամանակահատվածում կձեռնպահ մնա Արևմուտքի ռազմական օգնությունից և կկասեցնի մոբիլիզացիան։