20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Փաշինյանը պե՞տք է հրաժարական տա կամ ներողություն խնդրի․ աղմկահարույց գրառումների արձագանքները․ ՏԵՍԱՆՅՈՒԹ
Քաղաքականություն
30.05.2025 | 20:54
Վիրավորական բառերով և մեղադրանքներով այսօր վաղ առավոտից վարչապետ Նիկոլ Փաշինյանը վեց գրառում է արել ֆեյսբուքյան իր պաշտոնական էջում։ Եթե առաջին գրառումը սաղմոս էր՝ Մատթեոսի ավետարանից, ապա երկրորդ գրառման բովանդակությունը ցնցեց հանրությանը։
Օգտատերերից շատերը զարմանքով և զայրութով արձագանքեցին Փաշինյանի բառապաշարին, ոմանք էլ անգամ կարծիք հայտնեցին՝ գուցե վարչապետի հեռախոսը գողացե՞լ են։ Հույսը, սակայն, չարդարացավ․ հոգևորականներին և եկեղեցուն վերաբերող գրառումները շարունակվեցին։
Գրառումներից մեկով էլ Փաշինյանը հայտարարեց, թե կուսակրոնության ուխտը խախտած բոլոր հոգևորականները պետք է հեռանան հոգևոր ծառայությունից։
«Որևէ մեկի անձնական կյանքը որևէ մեկի գործը չէ։ Բայց ժողովուրդն իրավունք ունի ունենալ Եկեղեցի, հոգևոր ու բարոյական արժեքներ»,- գրել էր նա։
Ուշագրավ է, որ մինչ Փաշինյանը շեշտում է, թե որևէ մեկի անձնական կյանքը մյուսի գործը չէ, միևնույն ժամանակ, խոսում է ուրիշի սեռական կյանքից։
Եկեղեցու մասին դատողությունները Փաշինյանը սկսել էր դեռ երեկվանից, ինչին արձագանքել էին բարձրաստիճան հոգևորականներ։ Եկեղեցու և եկեղեցականների դեմ գրառումներին առավոտից միացավ նաև նրա տիկինը։
«Երկրի գլխավոր մանկապիղծները չուլան բառից դիվահարվել են»,- գրել է Աննա Հակոբյանը։
«Էմոցիաներին տուրք տալու փոխարեն, փաստեր ունենալու դեպքում, պետք է իրավական գործընթաց սկսել»,- շեշտում է «Ասպարեզ» ակումբի խորհրդի նախագահ Լևոն Բարսեղյանը։
Իսկ արդյո՞ք նման բառերով և բովանդակությամբ գրառումների համար Փաշինյանը որևէ պատասխանատվության կարող է ենթարկվել։ Factor TV-ն դիմեց Կոռուպցիայի կանխարգելման հանձնաժողով՝ պարզելու՝ արդյո՞ք կա վարույթ Փաշինյանի՝ վարքագծի կանոնների առերևույթ խախտման վերաբերյալ։ Հարցին պատասխանելու համար հանձնաժողովը գրավոր հարցում պահանջեց։ Ըստ ամենայնի, եթե անգամ վարույթ հարուցվի և հանձնաժողովը որոշի, որ վարչապետը վարքագծի կանոններ է խախտել, միևնույն է, որպես այդպիսին, պատասխանատվություն չի լինի։ Վարքագծի կանոնների խախտումը կարող է առաջացնել կարգապահական պատասխանատվություն, որը, սակայն, կիրառելի չի քաղաքական պաշտոն զբաղեցնող անձանց նկատմամբ: Նա պարզապես պարտավորվելու է Հանձնաժողովի եզրակացությամբ արձանագրված խախտման վերաբերյալ ներկայացնել հրապարակային պարզաբանում, որը ստացվելու պահից եռօրյա ժամկետում պետք է հրապարակվի մարմնի ղեկավարած պաշտոնական կայքում։ Այլ պատասխանատվություն, փաստացի, չկա։
Իրավապաշտպան Նինա Կարապետյանցի դիտարկմամբ՝ նման բառապաշար օգտագործող ցանկացած բարձրաստիճան պաշտոնյա պետք է ազատվի կամ հրաժարական ներկայացնի։
Խորհրդարանում Փաշինյանի՝ «համբալ», «վեր ընկի տեղդ, ներվերս չուտես» արտահայտությունները և «ձեզ տանելու եմ, լցնեմ ԱԱԾ պադվալները» սպառնալիքն ու կրկնվող անհարգալից խոսքն արդեն իսկ քննվում է Կոռուպցիայի կանխարգելման հանձնաժողովում։ Թե ինչ հետևանք կունենան այսօրվա գրառումները, կներկայացնենք հանձնաժողովի գրավոր պատասխանը ստանալուն պես։
Մանրամասները՝ տեսանյութում։
Ռոզա Վարդանյան
