Հանրային քննարկումների՝ ոչ շատ բովանդակային լինելը չեմ վիճարկի․ Երևանի փոխքաղաքապետ․ ՏԵՍԱՆՅՈՒԹ

«Պատշաճ իրազեկում չի՞ լինում, թե՞ ինչ-որ խոչընդատոներ կան՝ ոչ ծանոթ-բարեկամների հանրային լսումների մասնակցության»,- «Երևանի քաղաքապետարանի գործունեության թափանցիկությունն ու մասնակցայնությունը» թեմայով քննարկման ժամանակ ԹԻՀԿ հակակոռուպցիոն փորձագետ Վարուժան Հոկտանյանին հարց ուղղեց Երևանի փոխքաղաքապետ Սուրեն Գրիգորյանը։

Հոկտանյանը պատասխանեց՝ նկատի ունի թաղապետարաններում կազմակերպված հանրային քննարկումները։

«Թաղապետարաններում հանրային լսումները, ըստ իմ ուսումնասիրության, կա՛մ չէին կայանում, կա՛մ հրավիրվում էին թաղապետարանի աշխատողներ։ Չեն գալիս, քանի որ իրազեկումն է վատ կազմակերպած»,- նշեց Հոկտանյանը։

Հավելենք, որ ԹԻՀԿ-ը Երևանում որոշումների կայացման գործընթացում հանրային մասնակցությունը և թափանցիկությունը ապահովելու վերաբերյալ մի շարք առաջարկություններ է ներկայացրել՝

• Քաղաքապետարանի կայքում ստեղծել առանձին բաժին՝ լսումների/քննարկումների վերաբերյալ հայտարարությունների, դրանց ժամանակացույցի, օրակարգի, մասնակցության կարգի և արձանագրությունների հրապարակման համար։
• Օրենսդրորեն ամրագրել լսումների արձանագրությունների հրապարակման պարտադիր ժամկետ, օրինակ՝ 5 աշխատանքային օրվա ընթացքում։
• Առաջարկել գործնական մեթոդներ հանրային մասնակցության բարձրացման և հանրային լսումների մատչելիության ապահովման համար՝ խուսափելով լսումներ անցկացնել արձակուրդների ընթացքում, այդ թվում՝ կազմակերպելով դրանք ոչ աշխատանքային օրերին կամ երեկոյան ժամերին, իրականացնելով էլեկտրոնային ծանուցում շահագրգիռ կողմերին, ինչպես նաև կիրառելով առցանց հարթակներ և առաջարկելով առցանց մասնակցության հնարավորություններ (օրինակ՝ Zoom, Teams)։
• Կարգավորել համընդհանուր կիրառելիության որոշումների կայացման գործընթացը, ինչպիսիք են տրանսպորտային բարեփոխումները, աղբահանության վճարի փոփոխությունները և այլ նմանատիպ որոշումները, սահմանելով հստակ իրավական մեխանիզմներ՝ հանրային լսումների և քննարկումների պարտադիր իրականացման համար։
• Սահմանել հետադարձ կապի պարտադիր մեխանիզմ՝ պարզաբանելով, թե որ առաջարկներն են ընդունվել կամ մերժվել, և ինչու։ Տրամադրել վիճակագրություն՝  ներկայացված, ընդունված և մերժված առաջարկների քանակի վերաբերյալ։
• Իրականացնել հանրային իրազեկման արշավներ՝ օգտագործելով տեղական ԶԼՄ-ներ, սոցիալական ցանցեր և  կազմակերպելով համայնքային միջոցառումներ՝ բարձրացնելու բնակիչների իրազեկվածությունը մասնակցության հնարավորությունների, «Ակտիվ քաղաքացի» հարթակի գործառույթների, ինչպես նաև հանրային լսումների և քննարկումների գործընթացների վերաբերյալ՝ խթանելու նրանց ակտիվ ներգրավվածությունը։
• Ստեղծել շահագրգիռ կողմերի ոլորտայի շտեմարաններ՝ ներառելով ՔՀԿ-ներ, խոցելի խմբերի ներկայացուցիչներ, մասնագիտական կազմակերպություններ, անհատ փորձագետներ, բուհեր և ինստիտուտներ՝ նրանց ծանուցելով որոշումների նախագծերի մասին։
• Որոշումների ընդունման նախնական փուլում, երբ դեռ հնարավոր է ազդել որոշումների բովանդակության վրա, կազմակերպել թիրախային խորհրդակցություններ ՔՀԿ-ների, խոցելի խմբերի և ազդակիր համայնքի, մասնագիտական կազմակերպությունների, անհատ փորձագետների, բուհերի և մասնագիտացված ինստիտուտների հետ։
• Մշակել որոշումների կայացման գործընթացում հանրային իրազեկման և մասնակցության ապահովման վաղ փուլերի ուղեցույցներ՝ ներառելով կոնկրետ գործողությունների ցանկ, ծանուցումների ձևաչափ և ժամկետներ։
• Քաղաքապետարանի կայքում և սոցիալական մեդիայում ստեղծել առանձին բաժին՝ քաղաքապետին կից հանրային խորհուրդների գործունեության, կազմի, նրանց հետ կապվելու հնարավորությունների և մասնակցության կարգի վերաբերյալ տեղեկատվությամբ։
• Հանրային խորհուրդների գործունեության թափանցիկության ապահովման նպատակով հրապարակել նիստերի ժամանակացույցը և արձանագրությունները քաղաքապետարանի կայքում։
• Օգտագործել «Ակտիվ քաղաքացի» հարթակը հանրային կարևորություն ունեցող նախագծերի քննարկման համար։ Իրականացնել հանրային իրազեկման արշավներ՝ բարձրացնելու բնակիչների մասնակցությունը «Ակտիվ քաղաքացի» հարթակի աշխատանքներին։
• Սահմանել վարչական պատասխանատվություն՝ հանրային մասնակցության պահանջների խախտման համար։

Մանրամասները՝ տեսանյութում։