Վրաստանում ձերբակալվել է ընդդիմության առաջնորդներից Նիկա Մելիան

Թբիլիսիում ձերբակալվել է ընդդիմադիր «Ախալի» կուսակցության և «Փոփոխությունների համար կոալիցիայի» առաջնորդներից Նիկա Մելիան՝ դատական նիստի նախօրեին, որը պետք է քննարկեր նրա խափանման միջոցը փոխելու և կալանքի հարցը, գրում է Эхо Кавказа-ն։

Մելիան ձերբակալվել է փոդքասթի ձայնագրության մեկնելու ճանապարհին։ «Ախալի» կուսակցության մամուլի ծառայության տվյալներով՝ նա այժմ Դիղոմիի շրջանի ժամանակավոր կալանքի կենտրոնում է։

Վրաստանի Ներքին գործերի նախարարությունը հայտարարել է, որ ձերբակալությունը վարչական բնույթ է կրում, ընդդիմադիր գործիչը մեղադրվում է Վարչական օրենսգրքի 173-րդ հոդվածը խախտելու մեջ (վիրավորանք կամ այլ նվաստացուցիչ վարքագիծ իրավապահ մարմինների աշխատակցի նկատմամբ՝ ծառայողական պարտականությունները կատարելիս):

Փաստաբան Գեորգի Կոնդախիշվիլին ձերբակալությունը որակել է «բացարձակապես անհասկանալի»։ Նրա խոսքով՝ ոստիկանները պահանջել են տեղափոխել մեքենան, ապա Մելիայի նկատմամբ ուժային մեթոդներ են կիրառել։

Քաղաքական գործչի  աջակից Նիկա Գվարամիայի խոսքով՝ Մելիային «փաստացի առևանգել են»։

Ձերբակալությունը դատապարտել է Վրաստանի հինգերորդ նախագահ Սալոմե Զուրաբիշվիլիի գլխավորած «Դիմադրության հարթակը»։

«Ահաբեկչություն Վրաստանում․ քաղաքական առաջնորդի (Նիկա Մելիա) ևս մեկ անօրինական և ամոթալի ձերբակալություն երրորդ երկրում՝ ռեժիմի հակառակորդի (Գեորգի Բաչիաշվիլի) առևանգումից հետո։ Ամեն օր «ռուսական» ռեժիմն ուժեղացնում է բռնաճնշումները, բայց չի կարող ամրապնդել իր իշխանությունը կամ ներքին վստահությունը։ Բողոքը կշարունակվի»,- գրել է Զուրաբիշվիլին X սոցիալական ցանցում։

«Հակաամերիկյան «Վրացական երազանքի» ռեժիմը հենց նոր ձերբակալել է ընդդիմության հիմնական առաջնորդներից մեկին՝ Նիկա Մելիային, նույն հորինված պատրվակով, ինչ ընդդիմության դեմ նախորդ հարձակումների ժամանակ։ Ակնհայտ է, որ ընդդիմությունն ամբողջությամբ վերացվում է՝ երկիրը Չինաստանին վաճառելու համար։ Պատժամիջոցներն են լուծումը»,- իր հերթին X-ում գրել է ԱՄՆ կոնգրեսական Ջո Ուիլսոնը։

Թարգմանությունը՝ Էմմա Չոբանյանի