Քաղաքականություն
10.10.2018 | 15:45
Եթե Ազգային ժողովի պատգամավորների նկատմամբ որևէ ճնշում եղել է, ապա դա եղել է ժողովրդական ճնշում: Այս մասին այսօր՝ հոկտեմբերի 10-ին, ՀՀ Ազգային ժողովի նախագահ Արա Բաբլոյանի հետ հանդիպումից հետո լրագրողների հետ զրույցում ասել է վարչապետ Նիկոլ Փաշինյանը: «Ես ուղղակի ուրախ եմ, որ ԱԺ բազմաթիվ պատգամավորներ տեսան, լսեցին ժողովրդի ձայնը և անհրաժեշտ արձագանք տվեցին: Եթե պատգամավորների նկատմամբ որևէ ճնշում եղել է, դա ժողովրդական ճնշում է եղել: Այսօր շատերը նույնիսկ իրենց ընտանիքի անդամների, իրենց շրջապատի ճնշմանն են ենթարկվում»,- նշել է վարչապետ Փաշինյանը՝ պատասխանելով հարցին, արդյո՞ք իշխանության կողմից ճնշումներ եղել են այն պատգամավորների նկատմամբ, որոնք նախօրեին հայտարարեցին դեկտեմբերին արտահերթ խորհրդարանական ընտրություններ անցկացնելու որոշումը սատարելու մասին:
Վարչապետն այսօր Ազգային ժողով էր գնացել, իր խոսքով, լարվածությունը վերացնելու, քաղաքական այս իրավիճակը կատարյալ կայունության և հանդարտության պայմաններում հանգուցալուծելու նպատակով: Հանդիպել է նաև ՀՀԿ խմբակցության ղեկավար Վահրամ Բաղդասարյանի հետ. «ՀՀԿ-ի երեկվա հայտարարությունից հետո հարկ համարեցի գալ»:
Նիկոլ Փաշինյանը նաև վերահաստատել է. հրաժարական է տալու վարչապետի պաշտոնից և այդպիսով դնելու է դեկտեմբերին արտահերթ խորհրդարանական ընտրություններ անցկացնելու սկիզբը: «Այս պահին գոյություն ունեցող միակ սցենարը դա է»,- ասել է վարչապետը, իսկ հրաժարականի ժամկետների մասին հարցին դժվարացել է պատասխանել. «Հաշվարկի հարց է»:
Վարչապետ Փաշինյանը նաև համաձայն չէ հնչող կարծիքներին, թե արտահերթ ընտրությունների արդյունքում մոնոլիտ խորհրդարան ենք ունենալու. «Մենք ավելի մոնոլիտ խորհրդարան չենք ունենալու, քան ունենք այսօր: Եվ կասկած չկա, որ Հայաստանում ժողովրդավարությանը և ժողովրդավարական արժեքներին որևէ բան չի սպառնում: Դա մեր արժեքային համակարգն է, մեր հավատամքն է, մեր մոտեցումն է»:
Ինչ վերաբերում է Ընտրական օրենսգրքի փոփոխություններին. Փաշինյանի խոսքով, եթե խորհրդարանը չընդունի ԸՕ-ում առաջարկվող փոփոխությունների նախագիծը, «ընտրությունների կգնանք հին օրենսգրքով»:
