Աբխազիայի Պետանվտանգության ծառայությունը Թուրքիայի և Ադրբեջանի քաղաքացիների է ձերբակալել

Աբխազիայի ինքնահռչակ հանրապետության Գալիի շրջանում ձերբակալվել են Թուրքիայի և Ադրբեջանի քաղաքացիներ, գրում է Эхо Кавказа-ն։

Աբխազիայի Պետական ​​անվտանգության ծառայության տվյալներով՝ Ռուսաստանի ԱԱԾ սահմանային վարչության հետ համատեղ բացահայտվել է «պետական ​​սահմանն անօրինական կերպով հատելու ուղի»՝ ձերբակալելով օտարերկրյա քաղաքացիների երկու խմբի։

«Մեկ խմբում ընդգրկված են Թուրքիայի երկու քաղաքացի՝ 1997 թվականին ծնված Սելջուկ Գյուրենը, որը, օպերատիվ տվյալների համաձայն, Ինտերպոլի միջոցով միջազգային հետախուզման մեջ է Թուրքիայում նախկինում կատարված պատվիրված սպանության համար, և 2001 թվականին ծնված Դողան Բերսանը, որը նույնպես հետախուզվում է սպանության և թմրանյութերի ապօրինի շրջանառության համար»,- ասվում է հայտարարության մեջ։

Ըստ գերատեսչության՝ ձերբակալվել են նաև Ադրբեջանի քաղաքացիներ՝ 1974 թվականին ծնված Հասան Ազիզովը և 1990 թվականին ծնված Նամազ Թահմազլին։

Նշվում է, որ նրանք «փորձել են թաքնվել Աբխազիայում՝ Վրաստանում քրեական պատասխանատվությունից խուսափելու համար»։ Ի տարբերություն Ադրբեջանի քաղաքացիների՝ չի նշվում, թե որտեղ և ինչ նպատակով էին մեկնում ձերբակալված Թուրքիայի քաղաքացիները։

Պետական ​​անվտանգության ծառայության քննչական վարչությունը քրեական գործեր է հարուցել ձերբակալվածների նկատմամբ Քրեական օրենսգրքի 324-րդ հոդվածի 2-րդ մասի համաձայն (սահմանի անօրինական հատում, որը կատարվել է անձանց խմբի կողմից նախնական համաձայնությամբ կամ կազմակերպված խմբի կողմից՝ պատժվում է ազատազրկմամբ՝ երկուսից հինգ տարի ժամկետով):

Անկարան ու Բաքուն չեն մեկնաբանել Աբխազիայի իշխանությունների կողմից ձերբակալությունների լուրը։

Թարգմանությունը՝ Էմմա Չոբանյանի