Խորհրդակցություններ ենք անցկացնում Ադրբեջանի հետ խաղաղության պայմանագիրը ստորագրելու համար․ ԱԽ քարտուղար

«Հիմա մենք դիվանագիտական խողովակով խորհրդակցություններ ենք անցկացնում Ադրբեջանի հետ խաղաղության պայմանագիրը ստորագրելու համար»,- այս մասին կառավարության նիստից հետո լրագրողների հետ զրույցում ասաց ԱԽ քարտուղար Արմեն Գրիգորյանը:

Նա նշեց, որ պայմանագրի տեքստը վերջնականացված է, և միայն անհրաժեշտություն է մնացել, որ ստորագրվի պայմանագիրը:

Հարցին՝ ինչո՞ւ չի ստորագրվում խաղաղության պայմանագիրը, ԱԽ քարտուղարն արձագանքեց․ «Գիտեք, որ իրենք հրապարակային ներկայացնում են իրենց մոտեցումները, մենք էլ ունենք մեր մոտեցումներն այդ հարցերի շուրջ: Պարբերաբար խոսում ենք դրանց մասին, մենք պատրաստակամություն ենք հայտնել Խաղաղության պայմանագրի ստորագրման միևնույն օրը ստորագրենք Մինսկի խմբի լուծարման դիմումը, ինչպես նաև Սահամանդրության մասով էլ գիտեք ՀՀ դիրքորոշումը»։

Անդրադառնալով Սյունիքի մարզի Խոզնավար գյուղի բնակելի տան ուղղությամբ հնչած կրակոցին, Գրիգորյանն ասաց, որ դեպքին առիթ չի ունեցել ծանոթանալ։

«Սահմանային միջադեպերի հետ կապված մենք Ադրբեջանին առաջարկել ենք հետաքննության մեխանիզմ ստեղծել, հետաքննել տեղի ունեցած միջադեպերը։ Մենք շարունակում ենք աշխատել Ադրեջանի հետ, որպեսզի այդ մեխանիզմները ներդրվեն»,- նշեց ԱԽ քարտուղարը։

Նրա խոսքով՝ խաղաղության օրակարգով իրենք չեն խաբել ժողովրդին, սահմանազատված հատվածներում միջադեպեր չեն լինում։

Հիշեցնենք՝ ՊՆ-ի փոխանցմամբ՝ մայիսի 29-ին՝ ժամը 01:00-01:15-ն ընկած ժամանակահատվածում, Ադրբեջանի ԶՈՒ ստորաբաժանումները կրակ են բացել Սյունիքի մարզի Խոզնավար բնակավայրի ուղղությամբ, ինչի հետևանքով վնասվել է բնակելի տուն։