ԵՄ-ն և Ադրբեջանը ՀՀ-ի հետ կարգավորման գործընթացի հաջորդ քայլերն են քննարկել

Ադրբեջանն ու Եվրամիությունը Անվտանգության երկխոսության վեցերորդ հանդիպումն են անցկացրել, որը համանախագահել են Եվրոպական արտաքին գործողությունների ծառայության քաղաքական հարցերով գլխավոր քարտուղարի տեղակալ Օլոֆ Սկուգը և Ադրբեջանի նախագահի օգնական Հիքմեթ Հաջիևը։

Եվրոպական արտաքին գործողությունների ծառայության հաղորդագրության համաձայն՝ մասնակիցներն անկեղծ ու կառուցողական մտքերի փոխանակում են ունեցել ԵՄ-Ադրբեջան երկկողմ հարաբերությունների վիճակի, ինչպես նաև փոխադարձ հետաքրքրություն ներկայացնող արտաքին և անվտանգության քաղաքականության արդիական հարցերի շուրջ։ Նրանք ողջունել են վերջին բարձր մակարդակի հանդիպումները, որոնք ցույց են տալիս կողմերի համատեղ շահագրգռվածությունը՝ երկկողմ հարաբերություններում նոր գլուխ բացելու հարցում։

«ԵՄ-ն և Ադրբեջանը համաձայնել են շարունակել արտաքին և անվտանգության քաղաքականության հարցերի շուրջ պարբերական փոխանակումները, այդ թվում՝ էներգետիկայի և տրանսպորտային կապի ոլորտում համագործակցության խորացման ներուժի վերաբերյալ: ԵՄ-ն ընդգծել է տարածաշրջանային համագործակցության կենսական դերը»,- մասնավորապես, ասվում է ԵՄ դիվանագիտական ծառայության հայտարարության մեջ։

Բաքուն երախտագիտություն է հայտնել ԵՄ-ի կողմից Ադրբեջանին ականազերծման գործում ցուցաբերած աջակցության համար։ ԵՄ-ն ընդգծել է պատրաստակամությունը՝ ուսումնասիրելու ԵՄ գործիքները, որոնք կարող են նպաստել վերականգնողական աշխատանքներին։ Ադրբեջանը վերահաստատել է իր պաշտոնական դիմումը Եվրոպական խաղաղության հիմնադրամին։

«Մասնակիցները քննարկել են Հայաստանի և Ադրբեջանի միջև հարաբերությունների կարգավորման գործընթացի հաջորդ քայլերը»,- ասվում է հայտարարության մեջ;

Չի նշվում, թե ինչ նպատակով է Բաքուն դիմել Եվրոպական խաղաղության հիմնադրամին։

Հիշեցնենք, որ Ադրբեջանի նախագահ Իլհամ Ալիևի օգնական Հիքմեթ Հաջիևը Բրյուսել կատարած այցի շրջանակում մի շարք այլ հանդիպումներ էր անցկացրել։

Թարգմանությունը՝ Էմմա Չոբանյանի