Ուկրաինական ԱԹՍ-ները գրոհել են Մոսկվան․ բեկորներն ընկել են բնակելի շենքի վրա․ ՏԵՍԱՆՅՈՒԹ

Մոսկվայի քաղաքապետ Սերգեյ Սոբյանինը հայտարարել է, որ գիշերը «երեք անօդաչու թռչող սարքերի հարձակումը Մոսկվայի մարզի վրա, հետ է մղվել»։ Դրանցից մեկի բեկորները, դատելով ռուսական տելեգրամ ալիքներում հրապարակված տեսանյութերից, վնասել են Վերնադսկի պողոտայում գտնվող «Миракс Парк» բնակելի համալիրի ճակատային մասը։

Meduza-ի փոխանցմամբ՝ Սոբյանինը հայտնել է, որ ուկրաինական անօդաչու թռչող սարքի բեկորներն ընկել են Մոսկվայի Վերնադսկի պողոտայում։ Նրա խոսքով՝ բնակելի շենքը լուրջ վնաս չի կրել, և ոչ ոք չի տուժել։

Մոսկվայի մարզի Օդինցովո քաղաքային շրջանը նույնպես ենթարկվել է ուկրաինական անօդաչու թռչող սարքերի հարձակման: Ռուսական  տելեգրամ ալիքները հրապարակել են տեսանյութ, որտեղ երևում է, թե ինչպես է անօդաչու թռչող սարքը խոցվում բնակելի շենքերի վրա։ Խոցված անօդաչուի բեկորներն ընկել են շենքի բակում, մի մեքենա թեթև վնասվել է:

Ռուսաստանի Պաշտպանության նախարարությունը հայտնել է, որ մայիսի լույս 29-ի գիշերը ՀՕՊ ուժերը խոցել են ուկրաինական 48 անօդաչու թռչող սարք, այդ թվում՝ երեքը՝ Մոսկվայի մարզում։ Հաղորդվում է, որ Բելգորոդի մարզում խոցվել է 30 անօդաչու թռչող սարք, 4-ական՝ Օրյոլի, Ռյազանի մարզերում և բռնակցված Ղրիմում, 3-ը՝ Մոսկվայի, 2-ը՝ Բրյանսկի և 1-ը՝ Տամբովի մարզերում։

Ուկրաինական կողմից դեռևս մեկնաբանություն չի եղել։

Գիշերն էլ Ռոսավիացիան ժամանակավոր սահմանափակումներ է մտցրել մի քանի օդանավակայաններում, այդ թվում՝ Մոսկվայի «Վնուկովո» օդանավակայանում։

Թարգմանությունը՝ Էմմա Չոբանյանի