ՌԴ միջուկային բազաների սխեմաները հայտնվել են հանրային տիրույթում և լրագրողների ձեռքում

Դանիական Danwatch-ի և գերմանական Der Spiegel-ի լրագրողների տրամադրության տակ են հայտնվել ռուսական գաղտնի միջուկային օբյեկտների մանրամասն պլանները։ Պարզվել է, դրանք բացահայտ հրապարակվել են Ռուսաստանում մրցութային փաստաթղթերում, գրում է Current time-ը։

Ռուսաստանը միջուկային զենք պահելու համար օգտագործում է 11 օբյեկտ, որոնց մեծ մասն ընդլայնվել և արդիականացվել է։ Նման օբյեկտների ներքին պլանները խիստ գաղտնի են պահվում, սակայն լրագրողները, ուսումնասիրելով մրցութային փաստաթղթերը, Օրենբուրգի մարզի Յասնի քաղաքում գտել են ռազմավարական հրթիռային ուժերի բազայի հարյուրավոր սխեմաներ։

Փաստաթղթերը ցույց են տալիս, որ բազաները դրսից պաշտպանված են բարդ մոնիթորինգի համակարգերով՝ հեռակառավարվող գնդացիրներով և նռնականետերով, ինչպես նաև ժամանակակից հակաօդային պաշտպանության համակարգերով։ Արտաքին պարագիծը հագեցած է էլեկտրական ցանկապատերի եռաստիճան համակարգով, սեյսմիկ և ռադիոակտիվության սենսորներով, երկաթբետոնե պատերով, պայթյունակայուն դռներով ու պատուհաններով, ինչպես նաև մագնիսական կոնտակտներով և ինֆրակարմիր սենսորներով ահազանգման համակարգերով։

Մանրամասն նկարագրված է նաև կառույցների ներքին դասավորությունը, ներառյալ՝ պաշտպանիչ հագուստի և զենքի պահեստավորման սենյակների, կառավարման սենյակների և սենյակները միացնող ստորգետնյա թունելների տեղակայումը։

Փաստաթղթերում նաև նշված են վայրերը, թե որտեղ են զինվորները սնվում, քնում, հանգստանում և մարզվում, ինչպես նաև ինչ մարզասարքեր են օգտագործում և ինչ խաղեր են խաղում ազատ ժամանակ։

Ռուսաստանի անվտանգության քաղաքականության հարցերով փորձագետ և Նորվեգիայի պաշտպանության ակադեմիայի դասախոս Թոմ Ռյոսոթը նշում է, որ լրագրողների կողմից հայտնաբերված փաստաթղթերը հաստատում են, որ Ռուսաստանի ռազմավարական միջուկային ուժերի արդիականացումն իրական է, և որ «նոր տեսակի զենքի և ենթակառուցվածքների մասին մեծ խոսքերը հիմնավորված են շատ կոնկրետ գործողություններով»։

Բրիտանական ռազմական հետախուզության նախկին սպան էլ նման փաստաթղթերի արտահոսքը որակել է որպես Ռուսաստանում «գործընթացների լուրջ խափանում»՝ ասելով, որ փաստաթղթերը պոտենցիալ կերպով ռազմական բազաները խոցելի են դարձնում արտաքին հարձակումների համար։

Թարգմանությունը՝ Էմմա Չոբանյանի