Մերցը հայտարարել է, որ Գերմանիան կֆինանսավորի Ուկրաինայում հեռահար հրթիռների արտադրությունը

Ռուսաստանի պատերազմն Ուկրաինայի դեմ Բեռլինին և Կիևին ավելի է մոտեցրել: Այս մասին հայտարարել է Գերմանիայի կանցլեր Ֆրիդրիխ Մերցը Բեռլինում Ուկրաինայի նախագահ Վլադիմիր Զելենսկիի հետ հանդիպմանը, փոխանցում է DW-ի ռուսական ծառայությունը։

Նա նաև նշել է, որ կողմերը համաձայնել են վերսկսել գերմանա-ուկրաինական կառավարական խորհրդակցությունները և ամրապնդել գործընկերությունը քաղաքականության և տնտեսության ոլորտներում։

Մերցի խոսքով՝ Գերմանիան կաջակցի Ուկրաինային հեռահար զենքի ձեռքբերման հարցում։ Մասնավորապես, ըստ նրա, Բեռլինը կֆինանսավորի Ուկրաինայում հեռահար հրթիռների համատեղ արտադրությունը՝ առանց դրանց օգտագործման սահմանափակումների։ Համապատասխան հուշագիրը կստորագրվի երկու երկրների պաշտպանության նախարարների կողմից։ Միաժամանակ, Գերմանիայի կանցլերը շեշտել է, որ նման օգնության հետագա մանրամասները չեն բացահայտվի։

Մերցը նաև հրաժարվել է մեկնաբանել գերմանական TAURUS թևավոր հրթիռների հնարավոր փոխանցումը Ուկրաինա։ Նա խոստացել է,  որ Գերմանիան նաև կմեծացնի ճնշումը Ռուսաստանի վրա, որը չորս տարի շարունակում է պատերազմը Ուկրաինայի դեմ։ Նա նշել է, որ Բեռլինը դա անում է, այդ թվում, խաղաղ կարգավորման բանակցությունների ճանապարհ բացելու համար։

Բացի այդ, Գերմանիայի կանցլերը խոստացել է, որ Բեռլինը «կանի ամեն ինչ»՝ կանխելու համար «Հյուսիսային հոսք 1» գազատարի վերագործարկումը և «Հյուսիսային հոսք 2»-ի մեկնարկը, որոնք ոչնչացվել էին պայթյունի հետևանքով: Մերցը նշել է, որ նպատակը պետք է լինի «Մոսկվայի ռազմական մեքենայի թուլացումը»:

Զելենսկին շնորհակալություն է հայտնել Գերմանիային և նրա ղեկավարությանը Ուկրաինային օգնելու համար: Նա նույնպես նշել է, որ Ուկրաինան և Գերմանիան նոր համաձայնությունների են հասել պաշտպանական ոլորտում ներդրումների վերաբերյալ: Զելենսկին նաև կոչ է արել ՆԱՏՕ-ին՝ հրավիրել Ուկրաինային հունիսին կայանալիք գագաթնաժողովին, քանի որ դա չանելը, նրա խոսքով, կնշանակի Ռուսաստանի նախագահի հաղթանակը դաշինքի նկատմամբ:

Ավելի վաղ Գերմանիայի կառավարության պաշտոնական ներկայացուցիչ Ստեֆան Կոռնելիուսը հայտնել էր, որ Զելենսկիի Բեռլին այցի հիմնական թեման կլինի «Գերմանիայի աջակցությունը Ուկրաինային և կրակի դադարեցման ջանքերը» Ռուսաստանի հետ պատերազմում:

Թարգմանությունը՝ Էմմա Չոբանյանի