21.12.2025 | 20:36
Նիկոլ Փաշինյանը մասնակցել է Եվրասիական տնտեսական Բարձրագույն խորհրդի նիստին
Մասկի ընկերության Starship-ի իններորդ փորձնական թռիչքը ձախողվել է
Քաղաքականություն
28.05.2025 | 22:57
Ամերիկացի միլիարդատեր Իլոն Մասկի SpaceX ընկերության Starship հրթիռի հերթական փորձակումը ձախողվել է։ Այս մասին SpaceX-ը հայտնել է X սոցիալական ցանցում։
«Starship-ը ենթարկվեց արագ, չպլանավորված ապամոնտաժման: Թիմերը կշարունակեն ուսումնասիրել տվյալները և աշխատել հաջորդ թռիչքի փորձարկման վրա։ Նման փորձարկման ժամանակ հաջողությունը կախված է նրանից, թե ինչ ենք սովորում, և այսօրվա փորձարկումը կօգնի մեզ բարելավել Starship-ի հուսալիությունը, քանի որ SpaceX-ը ձգտում է կյանքը դարձնել բազմամոլորակային»,- ասվում է գրառման մեջ։
Հրթիռակիրը թռիչքը կատարել է մայիսի 27-ին, Թեխասի Starbase տիեզերանավից: Մեկնարկից մոտ կես ժամ անց Starship-ի երկրորդ փուլի վերահսկողությունը կորել է։
Հրթիռն անվերահսկելիորեն մտել է մթնոլորտ, որից հետո, հավանաբար, բռնկվել և կոտրվել է Հնդկական օվկիանոսի վրա: SpaceX-ի տվյալներով՝ միջադեպի պատճառ կարող էր լինել վառելիքի արտահոսքը:
Starship-ը 123 մետր բարձրություն ունի։ Այն ներկայում ամենամեծ և ամենահզոր տիեզերական հրթիռն է։
Starship-ի նախորդ ութ փորձնական արձակումներից չորսն ավարտվել են պայթյուններով։ Մասնավորապես, մարտին պայթել էր հրթիռի վերին աստիճանը։ Այնուհետև դրա բեկորներն ընկել էին Բահամյան կղզիների վրա։ Հունվարի կեսերին նմանատիպ միջադեպի ժամանակ բեկորներն ընկել էին Կարիբյան ծովի Թերքս և Քայքոս կղզիների վրա։
Թարգմանությունը՝ Էմմա Չոբանյանի
