12.03.2026 | 14:21
«Զայեդ» մրցանակի կես մլն դոլարը պետք է վերադարձվի պետությա՞նը, թե՞ ծախսվի անձնական որոշմամբ. Փաշինյանի պարզաբանումը․ ՏԵՍԱՆՅՈՒԹ
Էրդողանը խոսել է պաշտպանական ոլորտում Թուրքիա-Ադրբեջան-Պակիստան գործակցությունը խորացնելու մասին
Քաղաքականություն
28.05.2025 | 17:37
Բերձորում Ադրբեջան-Թուրքիա-Պակիստան եռակողմ գագաթնաժողովի ընթացքում Թուրքիայի նախագահ Ռեջեփ Թայիփ Էրդողանը հայտարարել է, որ աջակցում են երեք երկրների համագործակցությունը ռազմավարական գործընկերության վերածելուն։
«Մենք երեք եղբայրական երկրներ ենք՝ հիմնված փոխադարձ սիրո, հարգանքի և վստահության վրա, կապված ենք ընդհանուր մշակութային միջավայրով և կիսում ենք ընդհանուր արժեքներ։ Մեր երկրները՝ մոտ 350 միլիոն բնակչությամբ և 1 տրիլիոն դոլար տնտեսությամբ, շարունակում են ամրապնդել կապերը։ Ես ևս մեկ անգամ կցանկանայի ընդգծել, որ մենք աջակցում ենք մեր համագործակցությունը ռազմավարական գործընկերության վերածելու յուրաքանչյուր քայլին»,- ասել է նա։
Էրդողանը նաև նշել է՝ ուզում են, որ տարածաշրջանը դառնա կայունության, բարգավաճման և զարգացման կենտրոն՝ «30 տարի օկուպացիայի տակ գտնվող ադրբեջանական հողերի ազատագրմամբ»։ Նա հավելել է՝ կարծում է, որ այսօր առավոտյան բացված Լաչինի օդանավակայանը զգալի ներդրում կունենա տարածաշրջանի զարգացման և աշխարհին ինտեգրման գործում։
Էրդողանը նաև արտահայտել է Անկարայի գոհունակությունը, որ Պակիստանի և Հնդկաստանի միջև բռնկված լարվածությունն ավարտվել է հրադադարով ու ցանկություն հայտնել, որ այն վերաճի մշտական խաղաղության։ Ըստ նրա՝ Թուրքիան պատրաստ է իր ներդրումն ունենալ այդ ճանապարհին։
Անդրադառնալով պաշտպանական ոլորտում երեք երկրների համագործակցությանը՝ նա ահաբեկչության և սահմանային սպառնալիքների դեմ պայքարում վճռականությունը պահպանելու հույս է հայտնել։
«Մենք կնպաստենք այնպիսի նախագծերի, ինչպիսիք են «Զարգացման ուղին», «Միջին միջանցքը» և «Հյուսիս-Հարավ» տրանսպորտային միջանցքը, որոնք մեր համագործակցության ռազմավարական կարևոր ուղղություններ են։ Կգնահատենք էներգետիկ անվտանգության, սննդի անվտանգության և վերականգնվող էներգիայի ոլորտներում առկա հնարավորությունները։ Մենք հույս ունենք, որ այս բոլոր ոլորտներում հեղինակավոր նախագծեր իրականացնելով՝ մեր եռակողմ համագործակցությունը կբարձրացնենք շատ ավելի բարձր մակարդակի և նոր աշխատատեղեր կստեղծենք մեր ժողովրդի համար»,- հայտարարել է Թուրքիայի նախագահը։
Թարգմանությունը՝ Էմմա Չոբանյանի
