08.09.2026 | 10:31
Պապոյանը Դուբայում քննարկել է հայկական կառուցապատման ոլորտը միջազգային հարթակներում ներկայացնելու հնարավորությունները
Բաքվի պայմաններն օրինական են․ Ադրբեջանի ԱԳՆ-ն՝ Սահմանադրության և «Արևմտյան Ադրբեջանի» մասին Փաշինանի հայտարարություններին ի պատասխան
Քաղաքականություն
26.05.2025 | 17:15
Ադրբեջանի ԱԳՆ խոսնակ Այխան Հաջիզադեն արձագանքել է ՀՀ վարչապետ Նիկոլ Փաշինյանի՝ «Երևանյան երկխոսություն» միջազգային համաժողովի ժամանակ արված հայտարարություններին։ Հաջիզադեն ասել է, թե, իբր, «ՀՀ վարչապետի կողմից 2025 թվականի մայիսի 26-ին «Երևանյան երկխոսության» ժամանակ կրկնված դիրքորոշումը ոչ միայն ցույց է տալիս Հայաստանի անպատրաստ լինելը փոփոխություններ մտցնել իր Սահմանադրությունում՝ տարածքային պահանջներին անդրադառնալու և խաղաղության գործընթացում առկա խնդիրները լուծելու համար, այլև հարցեր է առաջացնում խաղաղության նկատմամբ Հայաստանի հանձնառության վերաբերյալ»։
«Նաև հարցեր է առաջացնում, թե ինչու է Հայաստանը, անտեսելով Մինսկի խմբի պաշտոնական լուծարման կոչերը, ամեն կերպ դա կապում խաղաղության պայմանագրի հետ՝ փորձելով պահպանել այս հնացած մեխանիզմը, որն այլևս չի համապատասխանում տարածաշրջանի իրողություններին: Հակամարտության լուծման հետ կապված, որը Մինսկի խմբի գործունեության ոլորտն է, Ադրբեջանն իրավացիորեն պահանջել է այս խմբի լուծարումը: Այս քայլի հետաձգումը կասկածներ է առաջացնում Հայաստանի մտադրությունների անկեղծության վերաբերյալ։ Պնդումը, որ Մինսկի խմբի լուծարումը նպատակ ունի փակել հայ-ադրբեջանական հակամարտությունը Ադրբեջանի տարածքում և այն տեղափոխել Հայաստանի ինքնիշխան տարածք, բացարձակ մանիպուլյացիա է։ Նման դիրքորոշում ընդունելով՝ Հայաստանն ակնարկում է, որ հակամարտությունը դեռ չի ավարտվել, և Մինսկի խումբը պետք է պահպանվի»,- ասվում է հայտարարության մեջ։
Հաջիզադեն նշել է, թե ՀՀ վարչապետի, այսպես կոչված, «Արևմտյան Ադրբեջանի» մասին հայտարարությունները, իբր, «փաստերի խեղաթյուրում են և ադրբեջանցիների անօտարելի իրավունքների ակնհայտ ժխտում», որոնք, իբր, «կազմում էին Հայաստանի բնակչության մեծամասնությունը»։
«Կայուն խաղաղության հասնելու համար Հայաստանը պետք է համապատասխանաբար փոփոխություններ կատարի իր Սահմանադրության մեջ, վերացնի տարածքային պահանջները դրանից և աջակցի Մինսկի խմբի լուծարմանը առանց որևէ պայմանի: Ադրբեջանի պայմանները խոչընդոտներ չեն, այլ տարածաշրջանային խաղաղությունն ու կայունությունն ապահովելու օրինական քայլեր»,- եզրափակել է Ադրբեջանի ԱԳՆ խոսնակը։
Հավելենք, որ Նիկոլ Փաշինյանը հայտարարել է, որ եթե ՀՀ Սահմանադրական դատարանը որոշի, որ խաղաղության պայմանագիրը չի համապատասխանում Հայաստանի Սահմանադրությանը, ապա այդ դեպքում ինքը կնախաձեռնի սահմանադրական փոփոխություններ և կհամոզի Հայաստանի ժողովրդին, որ դա պետք է երկարատև խաղաղության համար: Նա նաև հայտարարել է, որ ՀՀ ինքնիշխան տարածքում չի կարող լինել «Արևմտյան Ադրբեջան»։
Թարգմանությունը՝ Էմմա Չոբանյանի
