Հայաստանը երբևէ չի սահմանափակել Ադրբեջան այցելած որևէ փորձագետի մուտքը մեր երկիր. ԱԳՆ-ն` քննադատությունների մասին

«Փորձագետ Ջոշուա Կուչերը նախորդ անգամ իմ տեղեկություններով, խախտել էր հավատարմագրման կարգը դրա համար մուտքն արգելվել էր, պատշաճ հավատարմագրվելուց հետո նրա մուտքն, իհարկե, թույլատրվել է», – այս մասին «Երևանյան երկխոսության» համաժողովի շրջանակներում լրագրողների հետ ճեպազրույցում ասաց ԱԳՆ գլխավոր քարտուղար Դավիթ Կարապետյանը` արձագանքելով քննադատություններին, որ համաժողովին մասնակցող բանախոսներից Ջոշուա Կուչերայի մուտքն արգելված է եղել Հայաստան:

«Ոչ միայն Ջոշուայի մուտքի արգելքի մասին էր խոսք գնում, այլ նաև ևս մեկ փորձագետի: Ուզում եմ հստակորեն նշել` Հայաստանը երբևէ չի սահմանափակել հատկապես որևէ փորձագետի մուտքը, որը այցելել է Ադրբեջան, որից հետո Հայաստան: Ո´ չ նախկինում, ո´ չ ներկայում ՀՀ-ն չի սահմանափակել Ադրբեջան այցելած որևէ փորձագետի մուտքը մեր երկիր:

«Մենք պետք է կարողանանք աշխատել և պետք է աշխատենք այն մարդկանց և վերլուծաբանների հետ, որոնք, հնարավոր է, ունեն այլ կարծիք մի շարք հարցերի վերաբերյալ»,- պարզաբանեց ԱԳՆ պաշտոնյան:

Անդրադառնալով մի քանի ՀԿ-ների հայտարարությանն ուղղված ԱԳՆ-ին, որպեսզի թույլ չտան մեկ այլ փորձագետ Կրեգ Օլիֆանտի այցը Հայաստան, ով այս տարվա ապրիլին Ստեփանակերտում մասնակցել է ադրբեջանական ֆորումին, Կարապետյանն ասաց, որ նրա մասնակցության հայտը չեն մերժել: Նրա խոսքով` Օլիֆանտն է հայկական կողմին տեղեկացրել, որ տեխնիկական հարցերով պայմանավորված օդանավը չի նստել և չի մասնակցի ֆորումին: Կարապետյանը ափսոսանք հայտնեց, որ նա չի մասնակցում «Երևանյան երկխոսություն» համաժողովին:

Նշենք, որ բրիտանացի փորձագետ Ջոշուա Կուչերան Արցախյան պատերազմի օրերին Քարվաճառ էր այցելել:

Քաղաքագետ Տիգրան Գրիգորյանն էր ֆեյսբուքի իր էջում անդրադարձել թեմային` գրելով. «Միայն Հայաստանում են կարող ինչ-որ մեկի մուտքը երկիր արգելել, միջազգային սկանդալ հարուցել ու դրանից մի երկու-երեք տարի անց ոչ միայն նույն անձին հրավիրել գլխավոր դիվանագիտական ֆորումին, այլև բանախոս դարձնել բարձրաստիճան պաշտոնյայի մասնակցությամբ պանելային քննարկմանը»:

Factor. am-ը պարզաբանում խնդրեց նաև փորձագետից, սակայն, Ջոշուա Կուչերան հրաժարվեց մեկնաբանություն տալ:

Մանյա Պողոսյան