«Կյանքիցդ ա գնում, չարժե ստեղ հետ գալ»․ ինչ են պատմում ճաղերից այն կողմ ապրողները․ ՏԵՍԱՆՅՈՒԹ

34-ամյա Մանին «Արմավիր» քրեակատարողական հիմնարկի կալանավորներից է․ հնդիկ տղամարդն արդեն 8 տարի է՝ Հայաստանում է, հասցրել է շատ լավ հայերեն սովորել։ Անգամ 11 ամիս բանտում անցկացնելու հանգամանքից Մանին չարացած չէ։

«Արմավիր» քրեակատարողական հիմնարկն այսօր ամենաշատ կալանավորներն ու դատապարտյալներն ունի․ նախորդ տարեվերջի դրությամբ՝ հիմնարկում պահվում էր 685 կալանավոր և 369 դատապարտյալ։ Բոլոր խցերում նույն պայմաններն են։

Factor TV-ն քրեակատարողական հիմնարկ կատարած այցի ժամանակ հնարավորություն ունեցավ մի քանի խցեր մտնել։ Ինչպես պահման պայմանների, այնպես էլ սննդի մասով դատապարտյալներից որևէ դժգոհություն չլսեցինք․ արդյո՞ք պատճառն այն էր, որ մեզ ուղեկցում էին ՔԿՀ պետը, աշխատակիցներ՝ հիմնարկից, ինչպես նաև Քրեակատարողական ծառայությունից, դժվար է ասել։ 

«Արմավիր» ՔԿՀ-ն ունի 6 բնակելի մասնաշենք, պատժախցային, կարանտինային, երկարատև տեսակցությունների, պահպանության, ճաշարանի, բժշկական և վարչական մասնաշենքեր։ Բնակելի մասնաշենքերի խցերից յուրաքանչյուրն ունի 15,4 ք/մ ընդհանուր մակերես, իսկ զբոսանքի համար նախատեսված տարածքը դարձյալ խուց է, պարզապես վերևում երևում է երկինքը։

Զբոսանքի համար նախատեսված խցերի կողքին փոքրիկ մատուռ է, որտեղ գտնվող գրեթե բոլոր քանդակներն ու որմնանկարները դատապարտյալների ձեռքի գործն են։ 8 տարի ազատազրկման դատապարտված Արթուրն արդեն 4 տարի կրում է պատիժը, որից երկու տարին «Արմավիր» ՔԿՀ-ում է։ Ասում է՝ ազատ արձակվելուց հետո ամեն ինչ անելու է, որ էլ երբեք չվերադառնա։ Գողություն կատարելու հոդվածի հատկանիշներով դատապարտված երիտասարդն ասում է՝ հանցանքը կանխամտածված չի կատարել։

Միայն այս տարվա առաջին եռամսյակում ՀՀ-ում գրանցվել է հանցագործության ավելի քան 11,144 դեպք․ եթե անգամ հաշվի առնենք արդարացման, վաղեմության ժամկետն անցնելու, գործի կարճման և մի շարք այլ հանգամանքներ, միևնույն է, այս դեպքերով անցնող մի քանի հազար մարդ ամիսներ, գուցե՝ տարիներ անց կհայտնվի այս ճաղերից այն կողմ։

Մանրամասները՝ տեսանյութում։

Ռոզա Վարդանյան