ԱՄՆ-ում Իսրայելի դեսպանատան երկու աշխատակից է սպանվել

Վաշինգտոնում մայիսի 21-ի երեկոյան Capital Jewish Museum հրեական թանգարանի  դիմաց Իսրայելի դեսպանատան երկու աշխատակից է սպանվել, գրում է DW-ի ռուսական ծառայությունը։

Ոստիկանության  հաղոդմամբ՝ կասկածյալը ձերբակալվել է։ Նա 30-ամյա Էլիաս Ռոդրիգեսն է Չիկագոյից։ Նա մտել է ներս, մոտեցել չորս հոգուց բաղկացած խմբին և կրակել նրանցից երկուսի վրա։ Երբ նրան ձերբակալել են, նա բղավել է. «Ազատությո՛ւն Պաղեստինին»։ Սպանվածները  երիտասարդ տղամարդ և կին են։ ԱՄՆ նախագահ Դոնալդ Թրամփն իր Truth Social առցանց հարթակում ցավակցություն է հայտնել զոհերի ընտանիքներին և միջադեպը բացատրել հակասեմականությամբ։ ԱՄՆ ներքին անվտանգության նախարար Քրիստի Նոեմը հաստատել է Իսրայելի դեսպանատան երկու աշխատակիցների մահը։

«Իսրայելի դեսպանատան երկու աշխատակիցներ այսօր գիշեր  առանց պատճառի սպանվել են Վաշինգտոնի Հրեական թանգարանի մոտ։ Մենք ակտիվորեն հետաքննում ենք դեպքը և աշխատում ենք ավելի շատ տեղեկություններ ստանալու ուղղությամբ»,-գրել է նա X-ի իր միկրոբլոգում՝ցավակցություններ հայտնելով։

ՄԱԿ-ում Իսրայելի մշտական ​​ներկայացուցիչ Դենի Դանոնն էլ միջադեպը որակել է «հակասեմական ահաբեկչության զզվելի արարք»։ Նա նշել է, որ դիվանագետներին և հրեական համայնքին վնասելու փորձերը հատում են կարմիր գիծը։

Դանոնը վստահություն է հայտնել, որ ԱՄՆ իշխանությունները խստորեն կպատժեն մեղավորներին և խոստացել, որ Իսրայելը կշարունակի վճռականորեն պաշտպանել իր քաղաքացիներին և ներկայացուցիչներին ամբողջ աշխարհում։

Թարգմանությունը՝ Էմմա Չոբանյանի