Սա, կարծես, այն է, ինչ բոլորը ցանկանում են. ԱՄՆ դեսպանը՝ ԱԺ արտահերթ ընտրությունների մասին․ ՏԵՍԱՆՅՈՒԹ

ԱՄՆ դեսպանությունը շարունակում է ուշադիր հետևել Հայաստանի ներքին զարգացումներին, և ուրախալի էր, որ հոկտեմբերի 2-ին իրավիճակը խաղաղ և առանց բռնությունների հանգուցալուծվեց:

Այս մասին այսօր՝ հոկտեմբերի 9-ին լրագրողների հետ հանդիպմանը հայտարարեց Հայաստանում դիվանագիտական գործունեությունն ամփոփող ԱՄՆ դեսպան Ռիչարդ Միլսը: Ինչ վերաբերում է արտահերթ խորհրդարանական ընտրություններին. ամերիկացի դիվանագետի խոսքով՝ դրանց օրը պետք է որոշեն Հայաստանի կառավարությունը, կուսակցություններն ու Հայաստանի ժողովուրդը:

«Այն, ինչ ցանկանում ենք մենք՝ Միացյալ Նահանգները և Հայաստանի բոլոր բարեկամները, այն է, որ այդ ընտրությունները լինեն ազատ և արդար, դրանց նկատմամբ լինի վստահություն, բոլոր քաղաքական ուժերը՝ խորհրդարանական և արտախորհրդարանական, հնարավորություն ունենան պատրաստվել և մասնակցել ընտրություններին, վստահություն լինի ընտրական գործընթացների նկատմամբ և արդյունքում ձևավորվի խորհրդարան, որում կլինի ընդդիմություն և կայուն մեծամասնություն»,- ասաց Ռիչարդ Միլսը: ԱՄՆ դեսպանը զրույցներ է ունեցել տարբեր կողմերի հետ և հանգել եզրակացության, որ արտահերթ ընտրություններ բոլորն են ուզում. «Տարբեր կողմերի հետ իմ զրույցների ժամանակ ինձ համար պարզ է դառնում, որ սա, կարծես, այն է, ինչ բոլորն են ցանկանում, կա պատրաստակամություն՝ միմյանց հետ փոխզիջումների գնալ և հասնել այն նպատակին, որը կայունություն կբերի»:

Մանրամասները՝ տեսանյութում։