08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Պուտինը Թրամփին պատմել է Կրեմլի մոտ և Կարմիր հրապարակում մայիսի 9-ից առաջ «ահաբեկչական հարձակումների կանխման մասին»
Քաղաքականություն
20.05.2025 | 17:25
Ռուսաստանի նախագահի օգնական Յուրի Ուշակովը ռուսական լրատվամիջոցներին պատմել է Վլադիմիր Պուտինի և ԱՄՆ նախագահ Դոնալդ Թրամփի միջև երկուշաբթի տեղի ունեցած զրույցի այլ մանրամասներ։ Մասնավորապես, ըստ նրա, Թրամփի հետ հեռախոսազրույցում Պուտինը «խոսել է մայիսի 7-ի գիշերը Կրեմլի և Կարմիր հրապարակի մոտակայքում ահաբեկչական հարձակումների կանխման մասին», գրում է ՌԲԿ-ն։
«Մայիսի 6-ի լույս 7-ի գիշերը Ուկրաինան Ռուսաստանի տարածքի ուղղությամբ արձակել է 524 անօդաչու թռչող սարք, ինչպես նաև ամերիկյան Storm Shadow հրթիռներ (արտադրվում և Ուկրաինային մատակարարվում են Մեծ Բրիտանիայի և Ֆրանսիայի կողմից), որոնց մեծ մասն ուղղվել է դեպի Մոսկվա։ Գրեթե բոլորը խփվել են։ Միաժամանակ, կանխվել են մայրաքաղաքի կենտրոնում՝ Կրեմլի և Կարմիր հրապարակի տարածքում ահաբեկչական հարձակումների սպառնալիքները»,- ներկայացրել է Ուշակովը։
Պուտինը նշել է, թե այդ կերպ ուկրաինացիները ցանկացել են վախեցնել Հաղթանակի 80-ամյակի տոնակատարության հյուրերին, որպեսզի օտարերկրյա առաջնորդները չգնան Մոսկվա։ Ուշակովի խոսքով՝ երկու նախագահների զրույցում մեծ ուշադրություն է դարձվել պատերազմի ժամանակ ԽՍՀՄ-ի և ԱՄՆ-ի միջև դաշինքի թեմային։
«Թրամփը հիշում է այդ ռազմական եղբայրության մասին և ցավով է խոսել այն մասին, որ տարօրինակ հանգամանքների պատճառով մեր երկրներն այսօր ոչ միայն միասին չեն, այլև շատ հեռու են միմյանցից»,- ասել է Ուշակովը։
Մայիսի 6-7-ը հաղորդվել էր Մոսկվայի շրջանում անօդաչու թռչող սարքերի մի քանի հարձակումներ հետ մղելու մասին, իսկ Ռուսաստանի մի շարք քաղաքների օդանավակայանները ժամանակավորապես փակվել էին, ընդհատումներ են տեղի ունեցել նաև Մոսկվայի օդանավակայաններում։ Անօդաչու թռչող սարքեր էին խոցվել նաև Յարոսլավլի, Կալուգայի, Տուլայի, Ռյազանի, Օրյոլի, Կուրսկի, Վորոնեժի, Բրյանսկի և այլ շրջաններում։
Դոնալդ Թրամփը և Վլադիմիր Պուտինը հեռախոսազրույց էին ունեցել մայիսի 19-ի երեկոյան։ Սա ԱՄՆ-ի և Ռուսաստանի նախագահների միջև երրորդ հեռախոսազրույցն էր Թրամփի՝ ԱՄՆ նախագահի պաշտոնը ստանձնելուց հետո։ Նախորդ զրույցները տեղի էին ունեցել փետրվարի 12-ին և մարտի 18-ին։
Պուտինը հայտարարել էր, որ Մոսկվան պատրաստ է Կիևի հետ քննարկել «ապագա խաղաղության պայմանագրի վերաբերյալ հուշագիր»։ Զելենսկին, մեկնաբանելով Պուտինի հուշագիր գաղափարը, ասել էր, որ Ուկրաինան զորքերը դուրս չի բերի իր տարածքից, ինչպես պահանջում է Ռուսաստանը։
Թարգմանությունը՝ Էմմա Չոբանյանի
