Տասը հազար դրամի գողության համար հինգ տարվա ազատազրկման դատապարտված կնոջ երեխաները կարող են հայտնվել դրսում. ամեն ինչ կախված է Վճռաբեկ դատարանի որոշումից. ՏԵՍԱՆՅՈՒԹ

Այսօր Վճռաբեկ դատարանի դիմաց բողոքի ակցիա էր ի պաշտպանություն 3 անչափահաս և մեկ չափահաս երեխաների մայր Հասմիկ Սարգսյանի: Նա, հիշեցնենք, 10 հազար դրամ գողության համար դատապարտվել է 5 տարվա ազատազրկման։

Բողոքի ակցիայի մասնակիցները պահանջում էին, որպեսզի վարույթ ընդունվի Հասմիկ Սարգսյանի վճռաբեկ բողոքը, որով հնարավորություն կընձեռվի բեկանել Վերաքննիչ և Առաջին ատյանի դատարանների վճիռները և կկանխվի կնոջ ազատազրկումը 5 տարով:

Ակցիայի մասնակիցների պնդմամբ՝ Հասմիկ Սարգսյանը ոչ թե 10, այլ 4 հազար դրամի գողություն է կատարել: Ակցիայի մասնակիցները Վճռաբեկ դատարան էին բերել պանիր, բրինձ, կարտոֆիլ ու հնդկաձավար։ Նրանց պնդմամբ՝ չորս հազար դրամը բավականացնում է հենց այդքան առևտրի համար և հենց այդքան գումար գողանալու ու անչափահաս երեխաներին կերակրելու համար մորը հինգ տարվա ազատազրկման դատապարտելը, ըստ նրանց, անընդունելի է: Դատախազությունից տեղեկացնում են, որ Հասմիկ Սարգսյանը նախկինում ևս դատապարտվել էր նույնաբույթ հանցագործությունների համար։ Պատիժը, սակայն, պայմանականորեն չի կիրառվել։

«Ընդդեմ կանանց նկատմամբ բռնության» կոալիցիան ավելի վաղ դեպքի առթիվ հայտարարություն էր տարածել, որում ասվում է, որ Հասմիկ Սարգսյանի ընտանիքը գոյատևում է ծայրահեղ կարիքի պայմաններում՝ վարձակալած բնակարանում։

Ընտանիքի հայրը հեռացել է, մինչ ամուսնալուծվելն էլ պարբերաբար ֆիզիկական բռնության է ենթարկել կնոջը, որի հետևանքն են նաև երեխաների մոտ առկա առողջական բազմաթիվ խնդիրները։

Իրավապաշտպան Զարուհի Հովհաննիսյանը հարց է բարձրացնում, եթե չկան բավարար պայմաններ, ու անձը չի կարողանում լուծել իր սոցիալական խնդիրները, այդ դեպքում անձն ինչպե՞ս կարող է իր խնամքի տակ գտնվող անչափահաս երեխաներին կերակրել:

Ակցիայի մասնակիցները հուսով են, որ Վճռաբեկ դատարանի որոշման արդյունքում չորս երեխաները չեն զրկվի իրենց մորից։

Լիլիթ Շաբոյան