26.04.2026 | 14:19
Կվերականգնվի 19-րդ դարի «Քարակարմունջ» կամուրջը
Առերեսում գործարարներ Սամվել Մայրապետյանի և Սիլվա Համբարձումյանի միջև. վերջինը գործով վկայի կարգավիճակ ունի
Հասարակություն
09.10.2018 | 12:24
Գործարարներ Սամվել Մայրապետյանի և Սիլվա Համբարձումյանի միջև առերեսում է տեղի ունեցել: Factor.am-ի հետ զրույցում Համբարձումյանը հաստատեց լուրը:
Նա նշեց, որ մինչ այդ ինքն էլ է հարցաքննվել, հարցաքննությունը տեղի է ունեցել Մարտի 1-ի գործի շրջանակում, և հավելեց, որ հիմա այլ մանրամասներ չի կարող հայտնել. կարող է դիտվել որպես նախաքննական գաղտնիքի հրապարակում:
«Ես անկապ հայտնվել եմ էդ ցուցակի մեջ: Մարտի 1-ի օրերին ես փող եմ փոխանցել Սամվելին ու հայտնվել եմ էդ ցուցակի մեջ: Չգիտեմ՝ ինչո՞ւմ են կասկածում: Առերեսվել եմ, ցուցմունքում ինչ ասել եմ՝ նույնը կրկնեցի Սամվելի հետ առերեսման ժամանակ»,- ասաց Սիլվա Համբարձումյանը:
Գործարարը տեղեկացրեց նաև, որ ավելի վաղ նախաքննական մարմին է հրավիրվել որպես կասկածյալ, սակայն ցուցմունք տալուց հետո գործով որպես վկա է ներգրավվել:
Ավելի վաղ հայտնել էինք, որ Հատուկ քննչական ծառայությունը որևէ տեղեկություն չի տրամադրում հոկտեմբերի 7-ին ձերբակալված գործարար Սամվել Մայրապետյանի գործի մասին: Մինչև հիմա հայտնի չէ՝ ի՞նչ գործի շրջանակում է ձերբակալվել Մայրապետյանը և ինչո՞ւմ են նրան կասկածում: ՀՔԾ-ն չի հայտնում նաև՝ գործարարին մեղադրանք առաջադրվելո՞ւ է, թե՞ ոչ:
