ՌԴ-ի հետ չի կարելի խոսել վերջնագրի լեզվով․ Պեսկովը՝ Ուկրաինայի հետ հրադադարի պահանջի մասին

Ռուսաստանի նախագահի մամուլի քարտուղար Դմիտրի Պեսկովը մեկնաբանել է Արևմուտքի պահանջը, որ Կրեմլը պետք է համաձայնվի Ուկրաինայում 30-օրյա հրադադարին, գրում է Meduza-ն։

«Վերջնագրերի լեզուն անընդունելի է Ռուսաստանի համար։ Այն հարմար չէ։ Դուք չեք կարող Ռուսաստանի հետ նման լեզվով խոսել»,- ճեպազրույցի ժամանակ ասել է Կրեմլի խոսնակը։

Բացի այդ՝ Պեսկովը նաև հայտարարել է, որ Ռուսաստանի և Ուկրաինայի միջև Ստամբուլում բանակցությունները պետք է տեղի ունենան առանց նախապայմանների։ Նա ընդգծել է, որ մայիսի 11-ի գիշերն իր հայտարարության մեջ ՌԴ նախագահ Վլադիմիր Պուտինը «հստակ և միանշանակորեն ուրվագծել է Մոսկվայի դիրքորոշումը Ստամբուլում առանց որևէ նախապայմանի ուղիղ բանակցություններ վերսկսելու վերաբերյալ»։

Պեսկովը նաև հայտարարել է, որ Ռուսաստանը «տրամադրված է լրջորեն ուղիներ փնտրել Ուկրաինայում երկարաժամկետ կարգավորման հասնելու համար»։

Մինչ այս, եվրոպացի առաջնորդները կրկին կոչ էին արել հրադադար հաստատել բանակցությունների մեկնարկից առաջ։ Գերմանիայի կառավարությունը հայտարարել է, որ եթե Մոսկվան մինչև օրվա վերջ չհամաձայնի հրադադարի, Եվրամիությունը պատրաստ կլինի Ռուսաստանի դեմ պատժամիջոցների նոր փաթեթ ներդնել։

Գերմանիայի կառավարության խոսնակ Ստեֆան Կոռնելիուսը հայտարարել է, որ Մոսկվան մինչև մայիսի 12-ի վերջը ժամանակ ունի՝ համաձայնելու անվերապահ հրադադարին, հակառակ դեպքում՝ նոր պատժամիջոցներ կնախապատրաստվեն։

Ուկրաինայի, Գերմանիայի, Ֆրանսիայի և Մեծ Բրիտանիայի առաջնորդները մայիսի 10-ին կոչ էին արել Ռուսաստանին դադարեցնել կրակը առնվազն 30 օրով՝ սկսած մայիսի 12-ից: Ի պատասխան՝ Ռուսաստանի նախագահ Վլադիմիր Պուտինն առաջարկել էր, որ Ուկրաինան մայիսի 15-ին Ստամբուլում ուղիղ բանակցություններ սկսի։ Ուկրաինան ու եվրոպացի առաջնորդները պնդում են, որ Ռուսաստանը նախ դադարեցնի կրակը, մինչդեռ ռուս պաշտոնյաներն առաջարկում են նախ բանակցություններ անցկացնել:

Axios-ի տվյալներով՝ Ուկրաինայի նախագահ Վլադիմիր Զելենսկին կմեկնի Ստամբուլ՝ բանակցությունների, նույնիսկ եթե Պուտինը հրաժարվի մայիսի 12-ին դադարեցնել կրակը։

Թարգմանությունը՝ Էմմա Չոբանյանի