24.05.2026 | 11:59
Հրդեհ Երևանի Հրանտ Վարդանյան փողոցում
Էստոնիայում՝ ՌԴ-ի հետ սահմանին, Հիտլերի կերպարով Պուտինի պաստառն է փակցվել
Քաղաքականություն
09.05.2025 | 21:13
Էստոնիայի Նարվա քաղաքում՝ Ռուսաստանի հետ սահմանին գտնվող գետի ափին գտնվող միջնադարյան ամրոցի պատին ՌԴ նախագահ Վլադիմիր Պուտինի պատկերով պաստառն է փակցվել՝ Ադոլֆ Հիտլերի կերպարով, գրում է Meduza-ն։
«Պուտլերը ռազմական հանցագործ է» մակագրությամբ պաստառի լուսանկարը հրապարակվել է ամրոցի ներսում գտնվող Նարվա թանգարանի կողմից։ Թանգարանի տնօրեն Մարիա Սմորժևսկիխ-Սմիրնովան Պուտինի պատկերով պաստառն անվանել է «լայնամասշտաբ պատերազմի և ռազմական հանցագործությունների մասին հիշեցում-ուղերձ»։
«Այսօր՝ Եվրոպայի օրը, մենք նշում ենք խաղաղությունն ու ազատությունը։ Միևնույն ժամանակ, մեր կողքին Պուտինի կողմից սանձազերծված լայնածավալ պատերազմը շարունակվում է արդեն չորրորդ տարին։ Մենք բռնապետին անվանում ենք բռնապետ, պատերազմական հանցագործությունները՝ պատերազմական հանցագործություններ»,- ասել է նա ERR-ին տված մեկնաբանության մեջ։
Նարվա թանգարանը մայիսի 9-ին արդեն երրորդ տարին անընդմեջ կախում է «Պուտինը ռազմական հանցագործ է» կարգախոսով պաստառ, որպեսզի այն տեսանելի լինի սահմանի մյուս՝ ռուսական կողմում՝ Իվանգորոդում։
Թանգարանի տնօրենը հայտարարել է, որ սա «սադրանք չէ, այլ թանգարանի և «Պրոպաստոպ» կազմակերպության կողմից նախապես ծրագրված ինստալյացիա»։ 2025 թվականի սկզբին հայտնի էր դարձել, որ Մոսկվայի դատարանը հեռակա կարգով ձերբակալել է Մարիա Սմորժևսկիխ-Սմիրնովային՝ մի խումբ անձանց կողմից քաղաքական դրդապատճառներով ռուսական բանակի մասին «կեղծիքներ» տարածելու մեղադրանքով։
Իր հերթին, Իվանգորոդում ամեն տարի մայիսի 9-ին ափամերձ գոտում տեղադրվում են էկրաններ և բեմ, որը կարելի է տեսնել էստոնական կողմից։ 2025 թվականին Հաղթանակի շքերթը հեռարձակվել է էկրանին, իսկ ավելի ուշ սկսվելու է տոնական համերգը։
Թարգմանությունը՝ Էմմա Չոբանյանի
