Հնդկաստանը հայտարարել է Պակիստանի կողմից իր ռազմակայանների վրա ԱԹՍ-ներով և հրթիռներով հարձակման մասին

Հնդկաստանի Ջամմու քաղաքում նախօրեին պայթյուններ են որոտացել։ Երկրի կառավարությունը հայտարարել է, որ դա պակիստանյան կողմի հարձակում է Քաշմիրի տարածաշրջանում գտնվող ռազմական օբյեկտների վրա՝ անօդաչու սարքերի և հրթիռների կիրառմամբ։ Սա տեղի է ունեցել միջուկային զենք ունեցող հարևանների միջև բախումների երկրորդ օրը։

Reuters-ի լրագրողը հայտնել է, որ Ջամմուում 2,5 ժամ շարունակ հնչել են ազդանշաններ։ Երկօրյա մարտերի հետևանքով զոհվել է գրեթե չորս տասնյակ մարդ։

«Ջամմուի, Փատհանկոտի և Ուդհամպուրի ռազմակայաններն այսօր Ջամմու և Քաշմիրի միջազգային սահմանի երկայնքով թիրախավորվել են պակիստանյան անօդաչու թռչող սարքերով և հրթիռներով»,- X-ում հրապարակված հաղորդագրությամբ հայտնել է Հնդկաստանի պաշտպանության նախարարությունը։

Նշվում է, որ սպառնալիքներն արագորեն չեզոքացվել են։ Զոհերի կամ նյութական կորուստների մասին տեղեկություններ չեն հաղորդվել։

Հնդկական հեռուստաալիքները նաև ցուցադրել են լուսարձակներ և փայլատակումներ Ռաջաստան նահանգի Ջայսալմեր քաղաքի երկնքում, որը սահմանակից է Պակիստանի հարավային Սինդ նահանգին։

Իսլամաբադը հերքել է Հնդկաստանի Փանջաբ նահանգի Փաթհանկոտի, Քաշմիրի հովտի Սրինագարի և Ջայսալմերի վրա հարձակումը՝ նշելով, որ մեղադրանքները «լիովին անհիմն են, քաղաքական դրդապատճառներով և Պակիստանին զրպարտելուն ուղղված անզգույշ քարոզչական արշավի մաս են կազմում»։ Պակիստանի արտաքին գործերի նախարարությունն էլ հայտարարել է, որ երկիրը կարձագանքի ցանկացած սրացման՝ «լիակատար վճռականությամբ և Պակիստանի ինքնիշխանությունն ու տարածքային ամբողջականությունը պաշտպանելու համար»։

Հնդկական ռազմական աղբյուրն էլ անանունության պայմանով հայտնել է, որ Պակիստանից Ջամմու շրջանի Սատվարի, Սամբա, Ռանբիր Սինգհ Պուրա և Արնիա քաղաքների վրա արձակված ութ հրթիռները որսացել են հակաօդային պաշտպանության ստորաբաժանումները։ Աղբյուրը հավելել է, որ դրանք ավելի լայն հարձակման մաս էին կազմում։

Պակիստանի պաշտպանության նախարար Խավաջա Մուհամմադ Ասիֆն ավելի վաղ հայտարարել էր, որ հետագա հակահարվածներն «ավելի ու ավելի հավանական են», այն բանից հետո, երբ երկու երկրները միմյանց մեղադրել են անօդաչու թռչող սարքերով հարձակումներ իրականացնելու մեջ։

Հիշեցնենք, որ  նախօրեին Հնդկաստանի ԱԳ նախարար Սուբրամանյամ Ջայշանկարը հայտարարել էր, որ Դելին «մտադիր չէ սրել իրավիճակը» Պակիստանի հետ, սակայն ցանկացած ռազմական հարձակում «կարժանանա շատ կոշտ պատասխանի»։

Թարգմանությունը՝ Էմմա Չոբանյանի