Ինչպես է անցել Պուտինի հայտարարած «հրադադարի» առաջին գիշերը

Չնայած ՌԴ նախագահ Վլադիմիր Պուտինի կողմից ռազմական գործողությունների եռօրյա դադարի մասին  հայտարարությանը՝ ուկրաինական բանակը հայտնել է Ռուսաստանի կողմից մայիսի 8-ի գիշերը տեղի ունեցած հարձակումների մասին, գրում է DW-ի ռուսական ծառայությունը։

Ուկրաինայի ռազմաօդային ուժերի տելեգրամ ալիքը հաղորդում է Սումիի մարզի ուղղությամբ ռուսական մարտավարական ավիացիայի կողմից կառավարվող ավիառումբերի արձակման, ինչպես նաև՝ «առաջնագծի գոտիներում  ավիացիոն միջոցների կիրառման սպառնալիքի» մասին։ Այլ մանրամասներ չեն հաղորդվում։

Միաժամանակ հայտնի է դարձել, որ այս գիշեր Ուկրաինայի երկնքում ոչ մի ռուսական անօդաչու թռչող սարք չի գրանցվել։ Ռուսաստանի Դաշնության շրջանների վրա ուկրաինական անօդաչու թռչող սարքերի զանգվածային հարձակումները նույնպես դադարեցվել են։ Հաղորդվում է ԱԹՍ-ների կիրառման առանձին դեպքերի մասին։ Լիպեցկի նահանգապետ Իգոր Արտամոնովն է հայտնել մարզի տարածքում անօդաչու թռչող սարքերի հարձակման սպառնալիքի մասին։

Նիժնի Նովգորոդի օդանավակայանը փակ է Մոսկվայի ժամանակով ժամը 04:30-ից՝ «թռիչքների անվտանգությունն ապահովելու համար: Այս մասին հայտնել է «Ռոսավիացիան»։ Նախօրեին Մոսկվայի և Ռուսաստանի Դաշնության այլ շրջանների ուղղությամբ ուկրաինական անօդաչու թռչող սարքերի զանգվածային հարձակման հետևանքով ռուսական օդանավակայանների աշխատանքում տեղի էր ունեցել զանգվածային խափանում, որի հետևանքվ տուժել էր առնվազն 60,000 ուղևոր։

Ապրիլի վերջին Ռուսաստանի նախագահ Վլադիմիր Պուտինը հայտարարել էր եռօրյա հրադադարի մասին՝ կապված պատերազմում տարած հաղթանակի 80-ամյակի տոնակատարության հետ։ Հրադադարը ուժի մեջ է երեք օր՝ մայիսի 8-ի Մոսկվայի ժամանակով ժամը 00:00-ից մինչև մայիսի 11-ը Մոսկվայի ժամանակով ժամը 00:00-ն։

Ուկրաինայի նախագահ Վլադիմիր Զելենսկին էլ ավելի վաղ հստակեցրել էր, որ Կիևը չի ընդունում կարճաժամկետ հրադադարը և առաջարկել է հրադադար առնվազն 30 օրով։

Թարգմանությունը՝ Էմմա Չոբանյանի