Հունգարիայի ԶՈւ ԳՇ պետն Ադրբեջանում է․ նա այցելել է ռազմական օբյեկտներ

Ադրբեջանի պաշտպանության նախարարի առաջին տեղակալ,  գլխավոր շտաբի պետ, գեներալ-գնդապետ Քերիմ Վելիևը և պաշտոնական այցով Բաքվում գտնվող Հունգարիայի պաշտպանության ուժերի գլխավոր շտաբի պետ, պրոֆեսոր, գեներալ Գաբոր Բյորյոնդիի գլխավորած պատվիրակությունն այցելել են երկրի Ռազմաօդային ուժերի կենտրոնական հրամանատարական կետ, կիբերանվտանգության կենտրոն և կոմանդոս զորամասերից մեկը։

Ադրբեջանի ՊՆ-ի հաղորդմամբ՝ երկրի պաշտպանության փոխնախարար, ռազմաօդային ուժերի հրամանատար, գեներալ-լեյտենանտ Նամիգ Իսլամզադեն պատվիրակությանը տեղեկացրել է ժամանակակից չափանիշներին համապատասխանող և բարձր տեխնոլոգիական հնարավորություններով հագեցած հրամանատարական կետի կառուցվածքի և գործունեության մասին: Մանրամասն տեղեկատվություն է տրամադրվել երկրի օդային տարածքի վերահսկողության, թռիչքային գործողությունների համակարգման և շտաբային մակարդակով կառավարման գործընթացների վերաբերյալ։

Կիբերանվտանգության կենտրոնում հունգարական կողմը ծանոթացել է ադրբեջանական բանակի զինանոցում գտնվող ժամանակակից զենքի համակարգերի և տեղեկատվական տեխնոլոգիաների սարքավորումների կիբերանվտանգության ապահովման ուղղությամբ իրականացվող աշխատանքներին, ինչպես նաև կենտրոնում ստեղծված պայմաններին: Պատվիրակությանը մանրամասն ներկայացվել են արհեստական ​​բանականության վրա հիմնված ժամանակակից կիբերպաշտպանության գործիքները։

Երկու երկրների ԳՇ պետերն այցելել են նաև կոմանդոս զորամասերից մեկը։ Զինծառայողների գործողություններին հետևելուց հետո հյուրերը ծանոթացել են ադրբեջանական բանակի տրամադրության տակ գտնվող զենքի, զինամթերքի և ռազմական տեխնիկայի ցուցադրությանը, տեղեկություն է տրամադրվել դրանց մարտավարական և տեխնիկական բնութագրերի, պատշաճ օգտագործման կանոնների վերաբերյալ:

Հավելենք, որ նախօրեին էլ Հունգարիայի բանակի ԳՇ պետի գլխավորած պատվիրակությունը հանդիպել էր Ադրբեջանի ՊՆ ղեկավար Զաքիր Հասանովի և ԶՈՒ ԳՇ պետ Քերիմ Վելիևի հետ։

Թարգմանությունը՝ Էմմա Չոբանյանի