Զինծառայողներն ու պարեկները պետք է ստանան բարձր աշխատավարձ․ Վահագն Ալեքսանյան․ ՏԵՍԱՆՅՈՒԹ

«Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում փոփոխություն կատարելու մասին օրենքի նախագծի քննարկման ժամանակ ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանն անդրադարձավ «Հայաստան» խմբակցության պատգամավոր Գեղամ Մանուկյանի հայտարարություններին։

«Այդ ի՞նչ թվաբանություն է: 1700 դրամ մեկ օրվա համար աշխատավարձ, որ ասում եք, կազմում է ամսական 60 հազար դրամից քիչ: Դա Հայաստանի նվազագույն աշխատավարձից քիչ է: Չի կարող նման աշխատավարձ լինել: Գոյություն չունի, անհնար է նման աշխատավարձ լինի: Այսինքն՝ մենք ունենք զինծառայող, որ ամսական 50 հազար դրամ աշխատավա՞րձ է ստանում: Պարոն Մանուկյան, չկա տենց բան»,- հայտարարեց Ալեքսանյանը:

Ինչ վերաբերում է պարեկների թիրախավորմանը, պատգամավորը նշեց՝ ՀՀ ոստիկանության ծառայողները պետք է ստանան բարձր աշխատավարձ, բարձր աշխատավարձ պետք է ստանան նաև ՀՀ զինծառայողները:

«Առհասարակ, ՀՀ պետական ծառայողները պետք է ստանան բարձր աշխատավարձ»,- ընդգծեց պատգամավորը՝ նշելով, որ այս ուղղությամբ իրենք քայլեր ձեռնարկել են:

«Չեմ հասկանում՝ ինչ եք ուզում պարեկներից: Անկեղծ, ինձնից շատ ոչ ոք չի ուզում, որ մեր զինծառայողները ստանան հնարավոր ամենաբարձր աշխատավարձը, ու դրա ուղղությամբ ամեն ինչ արվում է, բայց չի կարելի անընդհատ թիրախավորել պարեկներին: Պարեկները հո օդից չե՞ն ընկել։ Այդ մարդիկ նույն տղերքն են, որ սահման են պահել»,- նշեց նա։

Հիշեցնենք՝ Գեղամ Մանուկյանը հայտարարել էր, թե մարտական հերթապահություն իրականացնող պայմանագրային զինծառայողներն օրական 1700 դրամ աշխատավարձ են ստանում, իսկ պարեկները՝ 1100:

Մանրամասները՝ տեսանյութում։