Եռօրյա զինադադարի վերաբերյալ Պուտինի նախաձեռնությունն ուժի մեջ է. Պեսկով

Կրեմլը հայտարարել է, որ ՌԴ նախագահ Վլադիմիր Պուտինի նախաձեռնությունը՝ Երկրորդ համաշխարհային պատերազմում  Հաղթանակի 80-ամյակի կապակցությամբ եռօրյա հրադադար հայտարարելու վերաբերյալ, ուժի մեջ է մնում: Կրեմլի խոսնակը, միաժամանակ, հավելել է, որ ուկրաինական կողմից ռուսական դիրքերին կամ օբյեկտներին հարվածներ հասցնելու ցանկացած փորձի դեպքում համարժեք պատասխան կտրվի, հաղորդում է «Ինտերֆաքսի»-ը։

«Անշուշտ, նախագահ Պուտինի նախաձեռնությունը տոնական օրերին ժամանակավոր զինադադարի վերաբերյալ արդիական է, և համապատասխան հրահանգներ են տրվել Գերագույն գլխավոր հրամանատարի կողմից»,- լրագրողներին ասել է ՌԴ նախագահի մամուլի քարտուղար Դմիտրի Պեսկովը:

Հիշեցնենք, Ուկրաինայի նախագահ Վլադիմիր Զելենսկին, նախօրեին, Չեխիա կատարած այցի ընթացքում նշել էր, որ Ռուսաստանի հետ հրադադարը հնարավոր է ցանկացած պահի։ Միևնույն ժամանակ, Զելենսկին կոչ էր արել Կիևի դաշնակիցներին մեծացնել ճնշումը Մոսկվայի վրա:

Չեխիայի նախագահ Պետր Պավելի հետ համատեղ մամուլի ասուլիսում ելույթ ունենալով՝ Զելենսկին նկատել էր, որ եթե էական ճնշում չգործադրվի, Պուտինը որևէ իրական քայլ չի ձեռնարկի հակամարտությունը դադարեցնելու ուղղությամբ։

«Այսօր արդեն 54-րդ օրն է, ինչ Ռուսաստանը անտեսել է նույնիսկ ամերիկյան հրադադարի առաջարկը», – նշել էր նա, հավելելով, որ նման համաձայնագիրը պետք է տևի առնվազն 30 օր՝ «դիվանագիտությանը իրական հնարավորություն տալու համար»։

Նկատենք, որ 30-օրյա զինադադար՝ երկարաձգման հնարավորությամբ, Ուկրաինան առաջարկել էր դեռևս մարտի կեսերին ԱՄՆ-ի նախաձեռնությամբ։ Ռուսաստանի նախագահ Վլադիմիր Պուտինն իր հերթին հայտարարել էր, որ սկզբունքորեն Մոսկվան դեմ չի դրան, բայց կան «նրբություններ»։

Ռուսաստանի արտգործնախարար Սերգեյ Լավրովը նույնպես վերջերս նշել էր, թե Մոսկվան հրադադարի պայման է համարում արևմտյան երկրների կողմից Ուկրաինային զենք մատակարարելուց հրաժարվելը հրադադարի ողջ ընթացքում։