Քաղաքականություն
06.05.2025 | 17:37
Լենինգրադի մարզի Վսևոլոժսկում բնակարանում ՀՀ քաղաքացու մահվան դեպքից հետո ուժային կառույցները խուզարկություններ են իրականացրել «Ռուսական համայնք» նեոնացիստների շարժման հինգ անդամների մոտ, սակայն նրանց ազատ են արձակել վկայի կարգավիճակով, գրում է currenttime-ը։
«Ֆոնտանկա»-ն հայտնել է, որ մայիսի 4-ի գիշերը «Ռուսական համայնքի» նեոնացիստները ներխուժել են Վսևոլոժսկի Լենինգրադսկայա փողոցի բնակարան, կոտրել դուռը և պղպեղային գազով ու էլեկտրաշոկերով հարձակվել տղամարդու վրա։ 37-ամյա հայաստանցի Գոռ Հովակիմյանն ու նրա 24-ամյա ընկերուհին՝ Սոչիից Ելիզավետան, փրկվելու համար փակվել են սենյակում։ Ըստ աղբյուրի՝ երբ նեոնացիստները փորձել են ներխուժել, Գոռը հրդեհել է կահույքը։ Նա մահացել է, իսկ աղջիկը ցատկել է պատուհանից և այժմ հիվանդանոցի վերակենդանացման բաժանմունքում է՝ այրվածքներով ու կոտրվածքներով։
Նշվում է, թե «Ռուսական համայնքի» նեոնացիստները Գոռ Հովակիմյանին, ինչպես նաև նրա համախոհներին նախկինում որոնել են՝ «շարժման համակարգողի նկատմամբ ահաբեկչության նախապատրաստման կասկածանքով»:
Հիշեցնենք, որ ՌԴ քննչական կոմիտեն հարուցել է քրեական գործ՝ անզգուշությամբ մահ պատճառելու հոդվածով։
