07.10.2026 | 23:48
Արթուր Դանիելյանը կալանավորվեց
Ժամանակավոր սահմանափակումներ են մտցվել ռուսաստանյան 13 օդանավակայաններում
Քաղաքականություն
06.05.2025 | 10:10
Մոսկվայի քաղաքապետ Սերգեյ Սոբյանինը տելեգրամյան իր ալիքում հայտնել է, որ Ռուսաստանի հակաօդային պաշտպանության ուժերը խոցել են հինգ ուկրաինական անօդաչու թռչող սարք, որոնք ուղղված էին դեպի Մոսկվայի։ Միևնույն ժամանակ, «Ռոսավիացիան» հայտարարել է Մոսկվայի հարավում գտնվող օդանավակայանների ժամանակավոր փակման մասին, հայտնել է BBC-ի ռուսական ծառայությունը։
Սոբյանինը չի հստակեցրել, թե որտեղ են խոցվել անօդաչուները։ Քաղաքապետի հայտարարությունից մի քանի րոպե անց Ռուսաստանի քաղաքացիական ավիացիայի վարչությունը հայտնել է, որ ժամանակավորապես փակվում են Մոսկվայի «Վնուկովո», «Դոմոդեդովո», «Ժուկովսկի» և «Շերեմետևո» օդանավակայանները։
Սոբյանինը նշել է, որ խոցված ուկրաինական անօդաչու սարքերից մեկի բեկորներն ընկել են Մոսկվայի հարավում՝ Կաշիրսկոյե մայրուղու վրա։ Մայրուղին սկիզբ է առնում Կրեմլից մոտավորապես ութ կիլոմետր դեպի հարավ և հասնում հարավ-արևելք՝ «Դոմոդեդովո» օդանավակայանի ուղղությամբ: Նրա խոսքով՝ «լուրջ վնասներ և տուժածներ չկան»։
Ուկրաինական անօդաչու թռչող սարքերի միաժամանակյա հարձակման մասին տեղեկություններ են ստացվել ՌԴ մի քանի այլ շրջաններից։ «Ռոսավիացիա»-ն հայտարարել է Կալուգայի, Վոլգոգրադի և Սարատովի օդանավակայանների փակման մասին։
РБК-ն էլ հայտնել է, որ մայիսի լույս 6-ի գիշերը ժամանակավոր սահմանափակումներ են մտցվել ռուսաստանյան 13 օդանավակայաններում: Մոսկվայի չորս օդանավակայանների, ինչպես նաև Սամարայի, Սարատովի, Վոլգոգրադի, Կալուգայի, Իվանովոյի, Յարոսլավլի, Նիժնի Նովգորոդի, Կազանի և Նիժնեկամսկի օդանավակայանների աշխատանքը դադարեցվել է։
Ավելի ուշ «Ռոսավիացիան» հայտարարել է, որ Մոսկվայի բոլոր չորս օդանավակայաններում չվերթները վերսկսվել են։
Ուկրաինական կողմը միջադեպը չի մեկնաբանել։ Սակայն ուկրաինացի պաշտոնյաները նախկինում բազմիցս հայտարարել են, որ նման հարձակումները նպատակ ունեն հարվածել ռազմական թիրախներին և ենթակառուցվածքներին, և դրանք հստակ պատասխան են Ռուսաստանի կողմից Ուկրաինայի բնակելի թաղամասերի և էներգետիկ ենթակառուցվածքների վրա շարունակական հարձակումներին։
