08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
ԵՄ-ն պատրաստվում է մինչև 2027 թվականի վերջն առաջարկել միջոցներ՝ արգելելու ռուսական գազի ներմուծումը
Քաղաքականություն
05.05.2025 | 23:12
Եվրամիությունը պատրաստվում է մինչև 2027 թվականի վերջն առաջարկել միջոցներ՝ ռուսական գազի ներմուծումն արգելելու համար, քանի որ դաշինքը ձգտում է խզել կապերը երկրի հետ, որը մի ժամանակ իր ամենամեծ էներգամատակարարն էր։ Այս մասին հայտնում է Bloomberg-ը՝ վկայակոչելով աղբյուրներին։
Նրանք հայտնել են, որ ԵՄ-ն առաջ է շարժվում ռուսական բրածո վառելիքից հրաժարվելու վաղեմի ծրագրի իրականացման ուղղությամբ՝ այս տարվա սկզբին Ուկրաինայում պատերազմը դադարեցնելու՝ ԱՄՆ-ի ջանքերի ազդեցությունը գնահատելու իր «ճանապարհային քարտեզի» հրապարակումը հետաձգելուց հետո։
Հունիսին ԵՄ-ն նախատեսում է առաջարկել արգելել գազի բոլոր գնումները Ռուսաստանի հետ նոր համաձայնագրերի և գործող սփոթ պայմանագրերի շրջանակում, որոնք կազմում են ներմուծման շուրջ մեկ երրորդը, և այն ուժի մեջ մտցնել մինչև տարեվերջ։ Գործակալության աղբյուրների տվյալներով՝ երկարաժամկետ պայմանագրերով խողովակաշարային գազի և հեղուկ բնական գազի մատակարարումները նախատեսվում է ավարտել մինչև 2027 թվականի վերջը։
Էներգետիկ ճգնաժամի համատեքստում ԵՄ պաշտոնյաները նշել են, որ գազի գները և անվտանգությունը մնում են հիմնական ուշադրության կենտրոնում, սակայն նրանք կարծում են, որ իրենց ծրագիրը սահմանափակ ազդեցություն կունենա գների վրա։
Մատակարարման կրճատման ժամկետները կախված կլինեն ԵՄ-ի՝ ԱՄՆ-ից, Կատարից, Կանադայից և աֆրիկյան երկրներից հեղուկացված բնական գազի այլընտրանքային մատակարարումներ ապահովելու կարողությունից։ Անցյալ տարի Ռուսաստանի հեղուկացված բնական գազի մատակարարումները, 2023 թվականի համեմատ, աճել են գրեթե 20 տոկոսով։
Անցյալ տարվա դեկտեմբերին ԵՄ տասը երկրներ, այդ թվում՝ Ֆինլանդիան, Լեհաստանը և Բալթյան երկրները, կոչ էին արել Եվրահանձնաժողովին «հնարավորինս շուտ արգելել ռուսական գազի և հեղուկացված բնական գազի ներմուծումը»։ Չնայած դրան՝ ռուսական հեղուկացված բնական գազի արգելքը չի ներառվել այս տարվա փետրվարին ընդունված ԵՄ 16-րդ պատժամիջոցների փաթեթում։
ԵՄ-ն արդեն արգելել է ռուսական ածխի և նավթի ներմուծման մեծ մասը։ Սակայն դեռևս հնարավոր չէ պատժամիջոցներ կիրառել Ռուսաստանից եկող խողովակաշարային գազի նկատմամբ, քանի որ մի շարք եվրոպական երկրներ դեռևս կախված են այդ մատակարարումներից, և միջոցառումները պահանջում են դաշինքի բոլոր անդամների միաձայն հաստատումը։
Թարգմանությունը՝ Էմմա Չոբանյանի
