29.04.2026 | 22:21
Պուտինն ու Թրամփը հեռախոսազրույց են ունեցել
Microsoft-ը փակել է Skype-ը․ այն գործում էր ավելի քան 20 տարի
Քաղաքականություն
05.05.2025 | 19:49
Skype Messenger-ը 2025 թվականի մայիսի 5-ին դադարել է գործել։ Skype-ի սեփականատեր Microsoft-ը նախապես զգուշացրել էր օգտատերերին մեսենջերի փակման մասին՝ առաջարկելով նրանց կա՛մ անցնել Teams-ի՝ պահպանելով իրենց կոնտակտներն ու հաշիվը, կա՛մ ներբեռնել հաղորդագրությունների արխիվը։
«2025 թվականի մայիսին Skype-ը կդադարի գործել։ Այս փոփոխությունը կազդի Skype ինչպես անվճար, այնպես էլ վճարովի ծառայությունների, բայց ո՛չ Skype for Business-ի վրա։ Skype-ի օգտատերերը կունենան Microsoft Teams Free-ին անցնելու հնարավորություն, որն առաջարկում է նույն հիմնական գործառույթներից շատերը, նույնիսկ ավելին։ Մուտք գործեք Microsoft Teams Free ցանկացած աջակցվող սարքից՝ օգտագործելով ձեր Skype-ի մուտքային տվյալները, և ձեր կոնտակտներն ու զրույցներն ավտոմատ կերպով կփոխանցվեն։ Դուք նաև կստանաք ծանուցում Skype հավելվածում, որը կառաջարկի ձեզ միջոցներ ձեռնարկել ձեր տվյալները տեղափոխելու համար։ Եթե չեք ցանկանում օգտագործել Microsoft Teams Free-ը, կարող եք արտահանել ձեր Skype տվյալները»,- հաղորդել էր ընկերությունը։
Skype-ն ամենահին մեսենջերներից է։ Այն գործարկվել է 2003 թվականին էստոնացի մշակողների թիմի կողմից՝ շվեդական Tele2 ընկերության նախկին աշխատակիցներ Նիկլաս Զենստրյոմի և Յանուս Ֆրիսի մասնակցությամբ։
Microsoft-ը մեսենջերը գնել է 2011 թվականին՝ 8,5 միլիարդ դոլարով։
Թարգմանությունը՝ Էմմա Չոբանյանի
