08.09.2026 | 22:34
ՆԳՆ շրջիկ սպասարկման գրասենյակները ծառայություններ կմատուցեն Կոտայքի և Գեղարքունիքի մարզերում
Նեթանյահուն չեղարկել է իր այցը Ադրբեջան, քանի որ Թուրքիան արգելել է օգտագործել իր օդային տարածքը
Քաղաքականություն
05.05.2025 | 12:41
Իսրայելի վարչապետ Բենիամին Նեթանյահուն չեղարկել է Ադրբեջան նախատեսված այցը՝ հղում անելով «խիտ քաղաքական գրաֆիկին»՝ ըստ նրա գրասենյակի հայտարարության։ Տեղական լրատվամիջոցները, սակայն, չեղարկումը կապել են Թուրքիայի կողմից Իսրայելի վարչապետի պաշտոնական ինքնաթիռին թռիչքի թույլտվություն չտրամադրելու հետ, գրում է Turkiye today-ը։
Walla լրատվականը հաղորդում է, որ Նեթանյահուն քննարկել է թռիչքի ուղղությունը Հունաստանի և Բուլղարիայի օդային տարածքներով վերաուղղորդելու հնարավորությունը, սակայն հրաժարվել է այդ տարբերակից, քանի որ դա գրեթե կկրկնապատկեր թռիչքի ժամանակը։
Սոցցանցերում շրջանառվող ենթադրություններին ի պատասխան՝ Թուրքիայի արտաքին գործերի նախարարությունը կտրականապես հերքել էր Նեթանյահուի ինքնաթիռին թռիչքի թույլտվություն տրամադրելու մասին պնդումները:
«Այն պնդումները, որ Իսրայելի վարչապետի ինքնաթիռը ստացել է թռիչքի թույլտվություն, բացարձակապես անհիմն են: Մեզ նման խնդրանք չի ուղարկվել»,- նշել էր նախարարության խոսնակը։
Ավելի վաղ տեղեկություններ էին հաղորդվել, որ Թուրքիան թույլատրել է Իսրայելի վարչապետ Բենիամին Նեթանյահուի ինքնաթիռին օգտագործել իր օդային տարածքը՝ Ադրբեջան այցելելու համար։
Հիշեցնենք, որ 2024 թվականի նոյեմբերին Թուրքիան փաստացի խոչընդոտել էր Իսրայելի նախագահ Իցհակ Հերցոգի մասնակցությանն Ադրբեջանում COP29 գագաթնաժողովին՝ արգելափակելով նրա ինքնաթիռի թռիչքը իր օդային տարածքով: Իսրայելի իշխանությունները ցանկացել էին օգտագործել Թուրքիայի օդային տարածքը Հերցոգի ինքնաթիռի համար, սակայն թուրքական կողմից մերժում էին ստացել։ Ի վերջո, Հերցոգի այցը Բաքու չեղարկվել էր։
Ներկայում Իսրայելից Ադրբեջան ուղիղ չվերթները սովորաբար պահանջում են Թուրքիայի, Սիրիայի, Իրաքի կամ Իրանի օդային տարածքի հատում։ Հաղորդվում է, որ Թուրքիան իր օդային տարածքը փակել է իսրայելական ինքնաթիռների համար 2024 թվականի սկզբից՝ ի պատասխան Գազայի վրա Իսրայելի հարձակումների։
Նեթանյահուն այցով Ադրբեջան էր ժամանելու մայիսի 7-ին։ Մայիսի 8-ին նախատեսվում էր Նեթանյահուի հանդիպումն Ադրբեջանի նախագահ Իլհամ Ալիևի և հրեական համայնքի հետ։
Թարգմանությունը՝ Էմմա Չոբանյանի
