Նոր լարվածություն Բաքվի և Մոսկվայի միջև․ ադրբեջանցի պատգամավորին ձերբակալել են Մոսկվայի օդանավայականում և արգելել մուտքը ՌԴ

Մոսկվայի ու Համայն Ռուսիո պատրիարք Կիրիլի Ադրբեջան այցի  ֆոնին՝ Մոսկվայի և Բաքվի հարաբերություններում նոր լարվածություն է առաջացել։

Մոսկվայի օդանավակայանում նախօրեին ձերբակալել են Ադրբեջանի Միլլի Մեջլիսի պատգամավոր Ազեր Բադամովին, նրան թույլ չեն տվել Աստրախան մեկնող  ինքնաթիռը նստել։ Ադրբեջանցի պատգամավորին օդանավակայանում ասել են, որ նրան արգելված է մուտք գործել Ռուսաստան։ Ռուսական կողմի հրավերով Ադրբեջանի պատվիրակությունը մեկնել է Ռուսաստանի Աստրախանի մարզ՝ մասնակցելու  երկրի նախկին նախագահ Հեյդար Ալիևի ծննդյան տարեդարձին նվիրված միջոցառումներին։ Այցը Աստրախան կազմակերպվել է Աստրախանի մարզի փոխնահանգապետ, կառավարության ղեկավար Դենիս Աֆանասևի նախաձեռնությամբ։

Պատգամավորին և պատվիրակությանը որևէ բացատրություն չի տրվել։ Ադրբեջանական լրատվամիջոցները գրում են, որ, ամենայն հավանականությամբ, ռուսական կողմը «սև ցուցակում» է ներառել Բադամովին՝ ՌԴ Պետդումայի պատգամավոր Նիկոլայ Վալուևի հասցեին քննադատական ​​արտահայտությունների համար, որը որոշ ժամանակ առաջ Ադրբեջանի հասցեին վիրավորական հայտարարություններ էր արել։

Ադրբեջանի ԱԳՆ-ն, մեկնաբանելով միջադեպը, հաստատել է պատգամավորի ձերբակալման մասին տեղեկությունը։

«Չնայած նրան, որ պատվիրակությունը Բաքվից թռել է Մոսկվա, ռուսական կողմը, առանց որևէ նախազգուշացման, Մոսկվայի օդանավակայանում ձերբակալել է պատգամավոր Ազեր Բադամովին և տեղեկացրել, որ նրան արգելված է մուտք գործել երկիր։ Մոսկվայի օդանավակայանում որոշ ժամանակ սպասելուց հետո նա վերադարձել է Ադրբեջան։ Մենք ռուսական կողմի այս որոշումը համարում ենք անբարյացակամ քայլ և սպասում ենք Ռուսաստանից պարզաբանումներ այս հարցի վերաբերյալ»,- ասել է ԱԳՆ խոսնակ Այխան Հաջիզադեն։

Նշենք, որ մայիսի 3-ին Ադրբեջանի նախագահ Իլհամ Ալիևն ու նրա կինը՝ երկրի առաջին փոխնախագահ Մեհրիբան Ալիևան, Բաքվում ընդունել էին Ռուսիո պատրիարքին։ Վերջինս Մեհրիբան Ալիևային պարգևատրել է Ռուս Ուղղափառ Եկեղեցու սուրբ իշխանուհի Օլգայի 1-ին աստիճանի շքանշանով՝ հասարակությունում ավանդական արժեքների պահպանման գործում ունեցած ներդրման համար։ Բացի այդ, պատրիարք Կիրիլը փոխանցել է ՌԴ նախագահ Վլադիմիր Պուտինի հրավերը՝ մասնակցելու Մոսկվայում մայիսի 9-ին կայանալիք Երկրորդ համաշխարհային պատերազմում հաղթանակի 80-ամյակին նվիրված միջոցառումներին։

Հիշեցնենք, որ Ադրբեջանի և Մոսկվայի հարաբերություններում լարվածություն էր առաջացել ադրբեջանական օդանավի կործանումից հետո։ Բաքվից Գրոզնի թռչող AZAL-ի օդանավը վթարի էր ենթարկվել 2024թ-ի դեկտեմբերի 25-ին Ղազախստանի Ակտաու քաղաքի մոտ։ Օդանավում գտնվող 67 անձանցից 38-ը մահացել էր։ Ավիաղետի համար Ադրբեջանը մեղադրում է ռուսական կողմին՝ պահանջելով պաշտոնապես ներողություն խնդրել և պատասխանատվություն ստանձել։

Միաժամանակ, Ադրբեջանը իշխանությունները վերջերս փակել են  Բաքվում «Ռուսական տունը», ապա նաև Sputnik-Ադրբեջան լրատվական գործակալությունը։

Էմմա Չոբանյան