29.04.2026 | 21:52
Թրամփը Սպիտակ տանը հանդիպել է էներգետիկ ընկերությունների ղեկավարների հետ
Թրամփը մայիսի 8-ն ԱՄՆ-ում հայտարարել է Երկրորդ համաշխարհային պատերազմում Հաղթանակի օր
Քաղաքականություն
02.05.2025 | 12:46
ԱՄՆ նախագահ Դոնալդ Թրամփը մայիսի 8-ը հռչակել է Երկրորդ համաշխարհային պատերազմում Հաղթանակի օր։ Նա նշել է, որ պատերազմում հաղթելու համար Միացյալ Նահանգները «շատ ավելին է արել, քան մյուս երկրները»։
«Մեր դաշնակիցներից և ընկերներից շատերը մայիսի 8-ը նշում են որպես Հաղթանակի օր, բայց մենք Երկրորդ համաշխարհային պատերազմում հաղթական արդյունքի հասնելու գործում, անկասկած, ավելի շատ բան ենք արել, քան որևէ այլ երկիր։ Ես այսուհետ մայիսի 8-ը վերանվանում եմ Երկրորդ համաշխարհային պատերազմում Հաղթանակի օր, իսկ նոյեմբերի 11-ը՝ Առաջին համաշխարհային պատերազմում Հաղթանակի օր։ Մենք հաղթել ենք երկու պատերազմներում էլ, ոչ ոք չի կարող համեմատվել մեզ հետ ուժով, քաջությամբ կամ ռազմական հմտությամբ, բայց մենք երբեք ոչինչ չենք տոնում։ Դա այն պատճառով է, որ այլևս չունենք առաջնորդներ, որոնք գիտեն՝ ինչպես դա անել։ Մենք կրկին կսկսենք տոնել մեր հաղթանակները»,- գրել է Թրամփը Truth Social-ում։
Հավելենք, որ ԱՄՆ-ը Երկրորդ համաշխարհային պատերազմում ներքաշվել է 1941 թվականի դեկտեմբերի 7-ին՝ այն բանից հետո, երբ ճապոնական ավիակիր նավատորմը հարձակվել էր Պերլ Հարբորի ամերիկյան ռազմածովային բազայի վրա։
Ամերիկյան բանակի ամենամեծ կորուստները եղել են Նորմանդական գործողության ընթացքում՝ երկրորդ ճակատի վայրէջքի ժամանակ՝ 1944 թվականի հունիսի 6-ից օգոստոսի 25-ը։ Գործողությունն ավարտվել է օգոստոսի 31-ին՝ Ֆրանսիայի ամբողջ հյուսիսարևմտյան մասի ազատագրմամբ։ ԱՄՆ-ը նաև օգնել է Երկրորդ համաշխարհային պատերազմի դաշնակիցներին ռազմական նյութերով, այդ թվում՝ զինամթերքով, տանկերով, ինքնաթիռներով, բեռնատարներով, ինչպես նաև սննդամթերքով և հումքով։
Թարգմանությունը՝ Էմմա Չոբանյանի
