Հասարակություն
01.05.2025 | 21:23
Երևանի Սարյան փողոցում տեղի ունեցած պայթյունից երկու տուժած կա։ Այսօր ժամը 19:31-ին Ճգնաժամային կառավարման ազգային կենտրոն ահազանգ է ստացվել, որ Սարյան փողոցի 2/2 հասցեում պայթյուն է տեղի ունեցել։ ՆԳՆ մամուլի խոսնակ Նարեկ Սարգսյանը Factor TV-ին փոխանցեց, որ տուժածներից մեկը տեղափոխվել է բժշկական կենտրոն, մյուսը տեղում է բուժօգնություն ստացել։
Factor TV-ն խոսել է տեղում բուժօգնություն ստացած քաղաքացու հետ, որը գլխի հատվածում վնասվածք էր ստացել։
«Չհասկացա՝ ինչ է տեղի ունենում։ Ուղղակի կանգնած էի, ինչ-որ բան կպավ ինձ»,- ասած տուժած քաղաքացին։
Սարյան փողոցում տեղի ունեցած գազաբալոններ տեղափոխող մեքենայի պայթյունից հետո ոստիկանությունը սահմանազատել է տարածքը։ Սահմանազատված տարածքում կան ևս չորս վնասված մեքենաներ։ Տեղում ոստիկանության և փրկարար ծառայության աշխատակիցները հորդորում են քաղաքացիներին չմոտենալ գետնին ընկած գազաբալոններին։
Factor TV-ի տեսախցիկը ֆիքսել է, որ պայթյունից հետո տարածված գազի հոտի պատճառով պատահարի հարակից տարածքում գործող սրճարանների հաճախորդներն ու անձնակազմը դիմակ են կրում։
Մանրամասները՝ տեսանյութերում։
Անի Թամրազյան
