11.08.2026 | 13:48
Արմեն Նազարյանի որդիները դարձյալ կկարողանան հանդես գալ Բուլղարիայի դրոշի ներքո
Մայր աթոռում Շառլ Ազնավուրի համար հոգեհանգստյան կարգ է կատարվել
06.10.2018 | 19:57
Հոկտեմբերի 6-ին Մայր Աթոռ Սբ Էջմիածնում, նախագահությամբ Մայր Աթոռի դիվանապետ Գերաշնորհ Տ. Արշակ եպիսկոպոս Խաչատրյանի և Սբ Էջմիածնի միաբանության, կատարվել է հոգեհանգստյան կարգ ՀՀ ազգային հերոս, աշխարհահռչակ շանսոնյե Շառլ Ազնավուրի հոգու խաղաղության համար. այս մասին տեղեկանում ենք Մայր Աթոռ Սբ Էջմիածնի տեղեկատվական համակարգից:
Հոգեհանգստյան արարողության ավարտին Մայր Աթոռի դիվանապետն անդրադարձել է մեծանուն հայորդու դժվարին և ծանր, բայց միևնույն ժամանակ հաջողություններով ու նվաճումներով լեցուն կյանքի ճանապարհին` նշելով, որ Շարլ Ազնավուրի կորստյան ցավով տրոփում է ոչ միայն համայն հայության, այլև արվեստասեր միջազգային ողջ հասարակության սիրտը:
«Դեպի արվեստի բարձունքը նրա ճանապարհը լեցուն է եղել խոչընդոտներով և մարտահրավերներով: Միայն երկու տասնամյակ նա հետևողականորեն ու համառորեն մաքառել է արվեստասեր հասարակության սիրուն և ճանաչմանն արժանանալու համար` հաղթահարելով տարբեր խոչընդոտներ:
Նա իրապես մարտիկ է, անձ, ով վերջապես բարձրացավ միջազգային և ֆրանսիական երգարվեստի օլիմպոս: Այսօր Շառլի անունը ճանաչված է ողջ աշխարհում: Նա խորհրդանշում է ոչ միայն հայ-ֆրանսիական բարեկամությունը, այլև նրա անունը խորհրդանիշ է դարձել մարդասիրության, բարեկամության և նեղյալների սրտերը սփոփող անձի: Շատերը վկայություն են բերել, թե ինչպե՛ս նրանք իրենց միայնության մեջ սփոփանք են գտել Շառլի խոսքերում:
Ֆրանսիայի նախագահն հուղարկավորության առիթով իր խոսքում արձանագրեց. «Շառլը, թողնելով իր երկիրը, եկավ հզորացնելու Ֆրանսիան»: Ես կավելացնեի, որ նա ոչ միայն հզորացրեց Ֆրանսիան, այլ նաև հավելեց ճանաչումը մեր ժողովրդի, մեծ զորակցություն ապահովեց Հայաստանին և մեր ժողովրդին», – ի մասնավորի ընդգծել է Արշակ եպիսկոպոսը:
Սրբազանը նշել է նաև, որ Հայոց Եկեղեցու բոլոր տաճարներում հայ ժողովուրդն այսօր իր աղոթքն է բարձրացնում Շառլ Ազնավուրի հոգու հանգստության և խաղաղության համար:
